Nëse numri i të infektuarve do të rritet me shpejtësi, transporti urban do të jetë viktima e radhës. Kështu është shprehur epidemiologu Dritan Ulqinaku, në një intervistë për Euronews Albania, ndërsa bëri një pasqyrë të përgjithshme të situatës në vend. Ai fajësoi qytetarët për mos ndërgjegjësim, e kjo reflektohet edhe në rritjen e të infektuarve.
“Nëse në autobus 100% e personave janë me maskë, nuk ka asnjë problem. Por mënyra e maskës që ne bëjmë shpesh herë duke e rrotulluar rreth gushës, sesa duke mbrojtur hundën dhe gojën, e bën sjelljen tonë të rrezikshme. Shtrëngimi i masave është kur është e pamundur që të arrihet në rrugë të tjera. Transporti urban absolutisht që do të jetë viktima e radhës, nëse shifrat do të kenë këtë trend”, u shpreh mjeku.
“Ne gjithmonë shpresojmë që të arrijmë të stabilizojmë kurbën. Faktikisht faktet janë kokëforta dhe shifrat vijojnë të rriten. Ne vazhdojmë që të kemi sjellje të dëmshme dhe për rrjedhojë shifrat vijojnë të rriten, që do të thotë që ndoshta masat do të vijnë duke u shtrënguar më tepër, nëse këto shifra vijojnë të rriten”, u shpreh ai.
Sipas tij, kjo situatë do të sjellë edhe shtrëngim të masave. “Gjithmonë është një balancë midis numrit të rinj të të infektuarve, kapaciteteve spitalore dhe masave shtrënguese. Nëse kapacitetet spitalore do të vijnë duke u reduktuar dhe numri i infektuarve do të rritet, patjetër që masat do të vijnë duke u shtrënguar. Do vazhdohet me kufizime të mëtejshme, nuk e kam targetin që t’i them”, tha ai më tej.
