Disa javë më parë kryefamiljari i familjes Biba pëson një paralizë që e lë të pamundur për të lëvizur, si pasojë e një sëmundje të rëndë. Duke lënë kështu në mëshirë të fatit tre fëmijët e tij. Pasi dy vite më parë bashkëshortja i humbi jetën si pasojë e një sëmundje të keqe. Jetojnë në fshatin Shëtel në Shijak, me një ndihmë ekonomike vetëm 30 mijë lekë të vjetra. Shahja, Mateo dhe Eridona janë të vetëm dhe të pamundur për ta ndihmuar babin e tyre, i cili ka nevojë sa më shpejtë për ndihmë mjekësore.
“Shumë keq, nuk kemi kushte, asnjë gjë. Kur humbëm mamin e kishim shumë të vështirë sepse unë do kujdesesha për shtëpinë. Më ra e gjithë shtëpia mbi supe, kushte nuk kemi. Tani që u sëmurë dhe babi, po lë e shkollën. Edhe unë dua të shkoj në shkollë si gjithë të tjerët. Por, nuk kam çfarë të bëj, do të rri në shtëpi tani që të kujdesem për babin. Ju lutem na ndihmoni për kurimin e babit, sepse nuk ka kush të kujdeset për ne.”
“Për herë të parë më ka rënë në prill, më kapi këmbën e dorën. Pastaj më mbrapa pas 3 muajsh, në 12 të natës. Ishim duke fjetur gjumë dhe unë mundohem të dal jashtë. Por, kisha dridhje trupi e nuk flisja më. As nuk lëvizja fare,”-rrëfen më vështirësi Ismaili.
Ndërkohë, Mateo edhe pse është në moshë të vogël, përsëri e ndjen peshën e problemeve.
“Isha duke fjetur te divani tjetër dhe babi nuk po fliste më. Kur u sëmurë babi mendova se nuk do të ngjallej më. Unë e nxjerr babin të dalë. E mbaj, por me frikë. Sepse kam hall se mos rrëzohet. I lutemi Zotit që të kurohet sa më shpejt. Nuk ka kush të kujdeset për ne mbrapa.”
Veç pamundësive të shumta ekonomike, Shahja, vajza e madhe do të braktisë edhe shkollën, pasi i duhet të kujdeset për babin. Janë tre fëmijë të frikësuar për të ardhmen dhe kanë nevojë sa më shpejt për ndihmë dhe pak shpresë.
Shumë keq jemi rritur, duke na falur njerëzit gjëra. Gjithë gjërat që janë për shtëpi na i kanë falur njerëzit. Shumë keq, më shumë spitaleve. Ishim vetëm, nuk kishim njeri, as të hanim nuk kishim e asnjë gjë. Asnjë gjë. Keq, nuk kemi kushte. Duhen lekë, duhen gjëra për babin. Nuk ka ilaçe. Është pa ilaçe. Nuk kemi lekë që t’i blejmë. Unë këtë vit hyj në vit të tretë, por nuk do të shkoj në shkollë. Është vetëm babi dhe më duhet të lë shkollën. Nuk mund t’ia dalim, e kemi shumë të vështirë.”
Ngjarjen e rëndë e ka publikuar fondacioni “Fundjavë Ndryshe”, i cili bën apel për t’i ardhur në ndihmë familjes Biba. E cila ka nevojë urgjente për ndihmë, në mënyrë që kryefamiljari të shpëtojë dhe tre fëmijët të mos mbeten në mes të katër rrugëve./ TIRANA TODAY
