Policia e Beratit ka dhënë më shumë detaje në lidhje me ngjarjen e rëndë, që u regjistrua mëngjesin e sotëm në Berat.
Sipas policisë, ngjarja është regjistruar në orën 07:30. I moshuari 75-vjeçar kishte hyrë për të pastruar pusin, por kishte mbetur i bllokuar. Më pas janë futur edhe dy nipat e tij për ta ndihmuar, por edhe ata nuk kanë mundur të dalin më.
Ishin zjarrfikëset ato të cilat i kanë nxjerrë nga pusi trupat e pajetë të tre shtetasve.
Njoftimi i policisë:
Në datën 07.05.2020, ora 07:30, në fshatin Dyshnik, Berat, shtetasi K. H., 75 vjeç, ka hyrë brenda në pus për ta pastruar atë dhe më pas janë afruar dy nipërit për ta ndihmuar, shtetasit N. H., 46 vjeç dhe G. G., 45 vjeç, të cilët kanë mbetur brenda në pus.
Shërbimet e Policisë, zjarrfikëset dhe ambulanca kanë shkuar menjëherë në vendngjarje.
Zjarrfikësit i kanë nxjerrë nga pusi trupat e pajetë të këtyre tre shtetasve dhe i kanë dërguar në morgun e spitalit të Beratit.
Grupi hetimor po punon për zbardhjen e shkakut të humbjes së jetës së tre shtetasve.
