Një tragjedi ka ndodhur gjatë xhirimeve të një filmi në SHBA, ku protagonist është një aktor i njohur. Aktori Alec Baldwin qëlloi me armë gjatë xhirimeve të filmit “Rust”, duke lënë të vdekur një grua dhe duke plagosur një burrë.
Ngjarja e rëndë ndodhi në New Mexico. Një zëdhënës i aktorit tha për mediat se incidenti ndodhi për shkak të mosfunksionimit të pistoletës manovër, që përdoret në të tilla raste gjatë xhirimeve të filmave.
Në xhirimet e filmit “Rust” në New Mexico, drejtori i fotografisë u vra dhe regjisori i filmit u plagos pasi aktori Alec Baldwin qëlloi një armë zjarri të enjten, sipas një deklarate dhënë për CNN.
Drejtoresha e fotografisë Halyna Hutchins, 42 vjeçe, u transportua në spital me helikopter dhe u shpall e vdekur nga personeli mjekësor në Spitalin e Universitetit të New Mexico, sipas Zyrës së Qarkut Santa Fe.
Drejtori Joel Souza, 48 vjeç, u transportua në Qendrën Mjekësore Rajonale Christus St. Vincent me ambulancë. Ende nuk ka informacione për gjendjen e tij shëndetësore. Ngjarja ka ndodhur rreth orës 13:50 sipas kohës lokale, thanë hetuesit.
“Rust” është një film perëndimor i vendosur në vitet 1880 ku luajnë Baldwin, Travis Fimmel dhe Jensen Ackles.
Zyra e policisë tha se hetimi “mbetet i hapur”, dhe ende nuk është ngritur ndonjë akuzë.
Burimi i lajmit: CNN. Përshtatur nga Tirana Today
