Në ditët më të vështira për Shqipërinë, ku deri më tani numërohen 40 të vdekur, vëllezërit nga Kosova dhe Maqedonia janë solidarizuar me dhënien e ndihmave.
Si fillim, nga Kosova erdhën trupa të specializuar për gjetjen e trupave që ndodheshin nën rrënoja. E më tej, të gjithë shqiptarët e Kosovës, nisën grumbullimin e ndihmave, për banorët e dëmtuar nga tërmeti shkatërrimtar.
Sikundër duken qartë edhe në këto pamje, shumë kamionë kanë ardhur drejt vendit tonë, për tu shpërndarë për familjet të cilat kanë mbetur në qiell të hapur. Astrit Panxha njofton ndjekësit e tij se bëhet fjalë për mbi 200 ton me ushqime dhe produkte sanitare, dhe mbi 1000 dyshekë.
Të gjithë këto produkte do t’u vijnë në ndihmë familjeve të rrënuara nga tërmeti, të cilat po i kalojnë këto orë ankthi nëpër çadra. “Ushtria e Prodhuesve të Kosovës, ndihma për vëllezërit dhe motrat e Shqipërisë. Kontigjenti i parë me ndihma nga Klubi i Prodhuesve të Kosovës, Devolli Group, M Sillos, Comodita, Frutex, Fluidi, Rugovë dhe Flutra. Mbi 200 ton me ushqime dhe produkte sanitare + mbi 1000 dyshek”, shkruan drejtori ekzekutiv i Klubit të Prodhuesve të Kosovës.
Me kalimin e orëve, numri i viktimave nga tërmeti shkatërrues i 26 nëntorit, për fat të keq po vijon të rritet.
