Pas përjashtimit nga grupi parlamentar demokrat, Berisha njoftoi një tur takimesh në mbarë vendin, me qëllim sipas tij, rikthimin e sovranitetit partisë më të madhe opozitare në vend.
Dje ish-kryeministri Sali Berisha është ndalur në qytetin e Fierit, ku ka shpërthyer në kërcënime në adresë të kryedemokratit Basha, kryeministrit Edi Rama dhe ndërkombëtarëve.
Para simpatizantëve demokratë të Fierit, ish-lideri i PD-së kërcënoi hapur Bashën se nëse bllokon Kuvendin e Partisë Demokratike, do përfundojë keq.
“T’i tregojmë vendin ish-kryetarit. Kryetari është peng sharlatan dhe do t’u diktojë ju vendimet antishqiptare. Të gjithë ata që i ka kapur frika e forumeve, kanë përfunduar keq. Prandaj mbaj forumet, mos ki frikë, mos mendo se do i shkelmosh. Forumet nuk i asgjëson dot. Mos luaj me pluralizmin. Lëri ato. Kuvendi i partisë do vendosë që çdo kryetar që i lejon vetes të marrë vendime që nuk janë pushtet i tij, por i forumeve të tjera, në momentin që shpall vendim, përveç kohës së luftës, është i shkarkuar dhe posti i kalon nënkryetarit dhe Sekretarit të Përgjithshëm”, deklaroi ai.
ish-kryeministri Sali Berisha tha se pas Enver Hoxhës, Edi Rama është kryeministri më tradhtar i Shqipërisë dhe kombit shqiptar. “Në 30 vite, këto janë ditët më të vështira për Shqipërinë dhe shqiptarët, jo vetëm për faktin miqtë e mi se ne sot kemi një regjim, i cili në Greqinë e Lashtë quhej kakistokracisë, më i keqi, por për faktin se sot, sot, duke marrë peng kreun e opozitës, Edi Rama i futi një thikë mbas shpine PD-së me dorën e pengut të tij, Lulzim Basha”, u shpreh Berisha.
