Blutë e Tiranës kanë prangosur shtetasin Orgest Drazhi, për “mos kallëzim krimi” lidhur me vrasjen e shokut të tij Jurgen Duka, në një supermarket në Tiranë.
36-vjeçari ka qenë prezent në konfliktin e çastit, që ndodhi mes Jurgen Dukës dhe efektivit të policisë, Arbër Sulës, për radhën në supermarket.
Ngjarja e rëndë ndodhi pak pas mesnate (14 dhjetor), në një supermarket në Tiranë në rrugën “Irfan Tomini”. Shkak i konfliktit që degradoi në vrasje u bë sherri mes dy personave, se kush do paguante i pari tek kasa. Autori i vrasjes, me detyrë agjent krimesh me detyrë në Dibër, është shpallur në kërkim nga policia.
Burimet bëjnë me dije se viktima Jurgen Duka, ka tentuar t’i paguaj pijet policit Sula. Pagesa është tentuar të bëhet me idenë “nuk më plas mua, unë paguaj edhe pijet e tua”. Kjo ka sjellë acarimin e policit, i cili e ka kundërshtuar, e pas konfliktit e ka qëlluar me plumb në zemër.
Fillimisht Jurgen Duka ka mbetur i plagosur, ndërsa ka ndërruar jetë në spitalin e Traumës në Tiranë, pasi plumbi e preku në zemër. Policia ka marrë në pyetje disa persona në lidhje me krimin, ndërsa në xhepat e rrobave të viktimës është gjetur 2.8 gramë kokainë.
Efektivi Arbër Sula ka qenë me leje në Tiranë, pasi do t’i nënshtrohej testit të drogës, pas vendimit të kryepolicit Gledis Nano. Testi nuk u bë për shkak të ngjarjes. Pasi kreu vrasjen, ai është larguar në drejtim të paditur, dhe ka humbur mes rrugicave.
