Vrasja e shtetasit grek Kostandinos Kaçifas, nga forcat RENEA ka tronditur mbarë opinionin. 35 vjeçari nga fshati Bularat i Gjirokastrës ka hapur zjarr në drejtim të forcave të rendit të cilat kanë shkuar për ta arrestuar, duke i kërkuar të dorëzohet. Por, ky i fundit ka vazhduar të shtënat, duke sjellë në ekzekutimin e tij. Ngjarja shkaktoi trazira ndërmjet politikës së dy vendeve. Aq sa në shtetin fqinj, një grup protestuesish tentuan të hynin edhe në ambasadën e Shqipërisë në Athinë. Gjatë tubimit dëgjoheshin thirrje nga më të ndryshmet dhe me nota të forta urrejtje.
“Çekiç dhe zjarr për qentë shqiptarë”, si edhe shprehje si “shqiptarët vrasës, po vrisni vëllezërit tanë në tokën greke.”
Por, për këtë ngjarje kanë reaguar edhe qytetarët të cilën shprehen për Tirana Today se këto ngjarje veç histerisë, rrezikojnë edhe jetën e shtetasve shqiptarë që jetojnë në Greqi.
“Nëse ata nuk na duan, as ne nuk i duam”
“U habita shumë kur e dëgjova si lajm, por me aq sa kanë vuajtur shqiptarët në Greqi, shumë mirë ia bëmë.”
“Veprimet anti-shqiptare nuk janë normale. Unë jam patriot, por mendoj se gjithkush duhet të mbajë përgjegjësi për veprimet që bën. Dhe nëse grekët na urrejnë ne, atëherë normalisht që dhe ne do i urrejmë.”
“Ne jemi popull dashamirës dhe shumë të mirë. Kurse ata janë të pabesë, grekët si grekët. Një gjë që të bëjnë shqiptarët ata e shohin si sebep për të shfaqur urrejtje. Ne jemi ndryshe, kemi më tepër tolerancë.”
“Për mendimin tim, forcat e policisë shqiptare kanë bërë detyrën e tyre. Ai djali me kokën e vetë ka dashur të bëhet hero. Kushedi çfarë ka kujtuar, se duke bërë një gjë të tillë po bën trimin. Edhe unë sikur të veproja çerekun e asaj që bëri ai, do më ndëshkonin edhe më ashpër.”
“Ai qëlloi i pari, duke vënë kështu në rrezik jetën e njerëzve që ishin aty pranë. Ndaj është e justifikueshme ajo që bëri policia.”
“Unë kam qenë ushtar me grekët në ’67 dhe prapë them që nuk bën mirë ata. Unë nuk i dua ata, derisa bën atë ngjarje. Deri më tani i kam respektuar, por jo më. Ata po bëjnë shumë gabime me shqiptarët”. TIRANA TODAY
