Presidenti i Kosovës, Hashim Thaçi është shprehur se mungesa e unitetit evropian po pengon përparimin e Kosovës drejt BE-së dhe NATO-s.
Në një konferencë për mediat, Thaçi tha se paqja në rajon aktualisht është shumë e brishtë, ndërsa theksoi se kushti për realizimin e demarkacionit me Malin e Zi ishte një mashtrim.
“Kriter për vizat ka qenë demarkacioni me Malin e Zi dhe na premtuan se pas kësaj do të hiqeshin vizat. Por fatkeqësisht ky ishte një premtim mashtrues”, u shpreh Thaçi
Ndër të tjera, Thaçi shtoi se Bashkimi Evropian nuk po reagon ndaj veprimeve armiqësore dhe anti-evropiane të Serbisë ndaj Kosovës.
“Çuditërisht kjo sjellje nuk e ka penguar Serbinë në perspektivën evropiane. Natyrisht që kjo sjellje ka bërë që të kemi një ngrirje të njohjeve për Kosovën nga pesë vende të BE-së. Marrëdhëniet mes Kosovës dhe Serbisë, si pasojë, vazhdimisht janë të acaruara. Dialogu, përkundër rezultateve të prekshme, tani është bllokuar nga Serbia. Kushtëzimi i dialogut nuk ka guxuar të lejohet të ndodh në asnjë rrethanë. Sepse asnjëra palë nuk ka guxuar ta bllokojë dialogun në asnjë rrethane. Ky ka qenë një parim i pashkruar që e kemi ditur të gjithë. BE ka hequr vizat për Bosnjë e Hercegovinën, ndërsa kjo e fundit vazhdon të mbajë vizat për qytetarët e Kosovës”, ka thënë ai.
Sa i përket dialogut, ai tha se pozicioni i Kosovës në të dy prezantimet ka qenë i qartë, teksa u shpreh se në takimin e ardhshëm në korrik që do të mbahet në Paris, do të ketë dinamik të re.
