Ish-Sekretari i parë i Komitetit të Partisë së Shkodrës, Muho Asllani, ka folur në lidhje me tërmetin e 26 nëntorit, i cili tronditi Shqipërinë pak ditë më parë.
I ftuar në emisionin “Kjo Javë” në News24, Asllani bën fajtor për këtë situatë ish-kryeministrin, Sali Berisha.
Sipas tij, në qeverisjen e Berishës janë ndërtuar shumë pallate më shumë kate. Duke bërë krahasimin me tërmetin e vitit 1979, ai tha se edhe ai ka pasur shumë kosto pasi janë paguar njerëzit për punën e bërë.
“Tërmeti i 1979 ishte shkatërrimtar sepse ne ishim mbështetur mbi forcat tona. Ky tërmet ishte po ashtu katastrofik, por ndihma ishte e madhe. Edi Rama është punëtor. Rama ka bërë shumë punë. Ai është djalë tepër punëtor. Rama kur jep porosi, kur nuk ua bëjnë, kthehet dhe e bën vetë punën. Këtu është faji i Sali Berishës. Sepse në kohën e tij katet e para i kanë bërë dyqane. Unë kam punuar në Durrës dhe nuk lejoheshin ndërtimet me shumë kate. Këta e kanë bërë 6 kat, 8 kat, 10 kate etj. I kanë bërë në kundërshtim me rregullat. U shkatërruan katet e para. Nuk dua ta politizoj, por opozita vetëm hedh vrer.
Kosto në atë kohë ishte e madhe, sepse janë paguar njerëzit për punën. Kosto ishte e madhe, sepse ishte partia në komandë, u fut çdo gjë me rregulla. Me thënë të drejtën, mu bë qejfi për punën që kemi bërë, për faktin se shumë kuadro u ngritën në detyrë”, tha ai.
