Agron Zhukri, gjyqtari që u caktua nga goglat që të verifikonte ligjshmërinë e Statutit të PD, miratuar në Kuvendin e Partisë Demokratike, thirrur nga Sali Berisha më 11 dhjetor 2021, është tërhequr nga çështja. Tashmë pritet që të hidhet një tjetër short në Dhomën Civile të Gjykatës së Tiranës.
Zhukri është pjesë e gjyqtarëve, të cilët nuk kanë kaluar procesin e Vettingut. Në një kohë kur pritej përballje e fortë mes dy kampeve, gjyqtari i caktuar për të shqyrtuar ndryshimet statutore të Kuvendit të 11 dhjetorit, Agron Zhukri ka hequr dorë nga procesi. “Përsa i përket kërkesës së gjyqtarit Agron Zhukri për heqje dore nga shqyrtimi i kërkesës së bërë nga Partia Demokratike e Shqipërisë, ju komunikoj se Gjykata e Tiranës, nuk ka informacion lidhur me këtë kërkesë”, thuhet në njoftimin për mediat.
Sipas informacioneve në këtë gjykatë, kërkesa e gjyqtarit ka ardhur dje, ndërsa nuk dihen qartë argumentet, por zakonisht largimi nga trupa gjykuese vjen për shkak të konfliktit të interesave. Tani e ka në dorë kreu i gjykatës të vendosë nëse do pranohet kërkesa dhe nëse po, do të duhet të hidhet short i ri. Por kjo lëvizje ka ngjallur shumë dyshime. Pas këtij vendimi, lindin dyshimet: A po tentohet që të vihet një gjyqtar besnik që të vulosë Kuvendin e 11 dhjetorit? Apo janë gjyqtarët që i tremben Berishës, dhe nuk duan të përzihen me konfliktin në PD? Sinjalet janë se nëse referendumi vendos shkarkimin e Bashës, ish-kryeministri Berisha do të tentojë që të mos lejojë kreun demokrat të futet në seli.
