Në muajin mars të këtij viti, SHBA dhe Kina fajësonin njëra-tjetrën për përhapjen e koronavirusit, duke rënduar kështu më tej marrëdhënien e vështirësuar nga lufta tregtare. Në atë kohë, Donald Trump e konsideronte virusin kinez.
Nga ana tjetër, Kina shprehej se ndihej e indinjuar nga përmendja e “virusit kinez”, duke mohuar pretendimet se nuk ka qenë transparente. Në kohën kur tashmë Kina po mban një situatë më të mirëmenaxhuar nga vendet e tjera, një fushatë po bëhet prej saj për të ndryshuar fillimin e pandemisë.
Gazeta zyrtare e ‘People’s Daily’, pretendoi në një postim në Facebook javën e kaluar se “të gjitha provat në dispozicion, sugjerojnë se koronavirusi nuk filloi në Wuhan”.
“Wuhan ishte vendi ku u zbulua koronavirusi për herë të parë, por nuk ishte aty ku filloi”, tha Zeng Guang, një ish-kryedemiolog në Qendrën Kineze për Kontrollin dhe Parandalimin e Sëmundjeve.
Një zëdhënës i Ministrisë së Jashtme, i pyetur në lidhje me raportet e mediave shtetërore se virusi ka origjinën jashtë Kinës, tha se ishte e rëndësishme të bëhej dallimi midis vendit ku u zbulua për herë të parë Covid-19, dhe vendit ku kaloi nga kafshët tek njerëzit.
Pretendimet se virusi ka origjinën jashtë Kinës nuk besohet nga shkencëtarët perëndimorë. Michael Ryan, drejtori i programit të urgjencave shëndetësore në Organizatën Botërore të Shëndetësisë (OBSH), tha javën e kaluar se do të ishte “shumë spekulative” të argumentohej se sëmundja nuk u shfaq në Kinë. “Është e qartë nga një perspektivë e shëndetit publik, që hetimet të fillojnë aty ku rastet njerëzore u shfaqën për herë të parë”, tha ai në një konferencë për shtyp në Gjenevë.
Rasti i parë me koronavirus llogaritet të jetë shënuar më 17 nëntor të vitit 2019. Autoritetet kineze u kritikuan për fshehjen e virusit në javët e tij të para.
Origjina e virusit është bërë pjesë e konfliktit diplomatik në mes Shteteve të Bashkuara të Amerikës dhe Kinës, me SHBA’-në që e quan sëmundjen ‘koronavirusi kinez’ ose ‘virusi i Wuhanit’.
