Kreu i PD-së, Lulzim Basha, priti sot në një takim ministren britanike Wendy Morton, e cila shoqërohej në këtë takim nga ambasadori britanik në Tiranë. Pas takimit me ministren britanike, Basha u prononcua për mediat lidhur me shkarkimin e Flamur Nokës. Ai tha se nuk mundet PD-ja që ka armik Ramën të përbaltet nga sajesa, shpifje dhe devijime. Sipas tij, këto janë agjenda personale që duan ta kthejnë PD-në në një bunker.
“Z. Noka i kam komunikuar shkarkimin e tij nga detyra si nënkryetar i Komisionit të Sigurisë. Nuk e kam përjashtuar, por e kam paralajmëruar. Nuk mundet që PD-ja, që ka kundërshtar dhe armik, armikun e shqiptarëve Edi Ramën dhe regjimin e tij të mbahet peng nga sajesa, shpifje dhe keqinformime që na devijojnë nga detyra jonë kryesore si opozitë, që është lufta ndaj këtij regjimi me të gjitha format dhe mënyrat.
Ne kemi lançuar iniciativa të shumta, dhe do të lançojmë të tjera, për të zhbërë dhe gërryer themelet e regjimit Rama-Doshi-Rakipi. Dhe nuk mund të mbetemi peng i agjendave personale që kërkojnë ta kthejnë PD-në në një bunker për interesa personale të kujtdo qofshin këto. Prandaj shtrembërime të tilla, nuk do të tolerohen”, deklaroi kreu i PD-së.
