Presidenti rus Vladimir Putin do të presë sot në një takim në Moskë kancelaren gjermane Angela Merkel. Kryefjala e takimit do të jetë tensionet në Lindjen e Mesme, sidomos pas ngjarjeve të fundit ndërmjet Iranit dhe SHBA-së.
Kremlini zyrtar ka konfirmuar se pjesë e agjendës së bisedimeve ndërmjet dy krerëve do të jetë edhe gjendja në Libi dhe Siri.
Lajmi është konfirmuar dhe nga zëdhënësi i qeverisë gjermane Steffen Seibert.
“Qartazi, tensionet mes Shteteve të Bashkuara dhe Iranit, në mesin e disa çështjeve të tjera, mund të jenë temë e bisedimeve mes kancelares dhe presidentit Putin në Moskë”, tha ai.
Zëdhënësi vuri në dukje rëndësinë e Rusisë për zgjidhjen e konflikteve duke qenë se është anëtare e përhershme e Këshillit të Sigurimit të Kombeve të Bashkuara.
Rreth një muaj më parë, Merkel dhe Putin u takuan në Paris, ku u diskutua për arritjen e një armëpushimi në pjesën lindore të Ukrainës.
