Kryedemokrati Basha ka qeshur me batutat e kryeministrit Rama, dhe nuk ka mundur dot që të qëndrojë serioz para deputetëve sot në Kuvend. Pas një morie të sharash e ofendimesh mes Bashës e deputetit Shalsi, ndërhyri Rama, i cili duket se i vuri vulën këtij debati.
Në fjalën e marrë në Kuvend, kreu i qeverisë Edi Rama thumboi kreun e PD-së, Lulzim Bashën duke i thënë që mos të bëhet si ai, duke iu referuar Sali Berishës, pas fjalëve të rënda që u hodhën në Parlament mes kryedemokratit dhe deputetit socialist, Eduard Shalsi.
“Mos e imito atë, se po imitove atë re në gropë. Ta kam thënë dhe publikisht dhe personalisht: Mos u bëfsh kurrë si ai.
Rri në lartësinë e flokëve të rregulluara që ke, dhe xhaketën që ke veshur, dhe mos e prish gojën siç e prishe sot. Nuk mund të bëhesh dot ti goja më e shthurur. Se unë ta them se të konsideroj edhe mik”, tha Rama. Nga ana tjetër shihej Basha që nuk mbante dot të qeshurën.
Basha ka shkuar në Kuvend me 30 minuta mungesë, duke humbur debatin lidhur me kohën e fjalës së deputetëve. Por sapo ka hyrë në Kuvend, ka gjetur në foltore deputetin e Partisë Socialiste, Eduard Shalsin, me të cilin është përplasur edhe verbalisht.
DEBATI NË SALLË:
Shalsi: Keni një zakon të tmerrshëm! E bëni kudo, ky padurimi për të reaguar kur tjetri flet. Është çështje edukate. Po nuk duruat, nuk do të dëgjoni dhe nuk do të mësoni kurrë.
Basha: Pusho mor ti! Injorat! Plehrë! Ky ke mësuar ti more? Je haleja e Sudeve. Ta përplas kokën! Maskara.
Shalsi: Keni gjithë keqardhjen time…
Basha: Pusho more…! Mos mu drejto ashtu ti
Shalsi: Në një kontekst tjetër do të jepja një përgjigje tjetër
Basha: Ta jap unë po deshe ty dhe të gjithë…Atë që se morët dot…
Nikolla: Ju kujtoj etikën z. Basha
Shalsi: Nuk e ke kuptuar kurrë sa i dobët je
Basha: Ta tregoj unë dobësinë
Shalsi: Mund të trembë ndonjë laraskë rreth teje por…përveçse më bën për të qeshur me natyrën tënde të të bërit të të fortit.
Basha: Dërr-dërret e tyre.
Shalsi: Do flasim edhe për Bechettin, por e ndjej veten të pafuqishëm për të debatuar. Ta kuptoj hallin. Por nuk ta qaj!
Basha: Jeni një grup horrash dhe banditësh.
Shalsi: Me të vërtetë mendon që..
Basha: Ore fatkeqësi!
Shalsi: Do ta jepja më gjithë qejf fjalën time sepse…A e di pse qesh?
Basha: Koha juaj ka filluar të mbarojë. I gjithë llumi
Shalsi: Ke 16 vjet në politikë dhe nuk ke kuptuar asgjë
Basha: Ta tregoj unë se çfarë kam kuptuar, nuk mbijetohet. Ti ke hyrë në politikë për t’u pasuruar.
Shalsi: Nuk e di sa e besoni për këto që thotë, por një gjë do t’ju them.
Nikolla: Tani mbaroi koha! Z. Shalsi, koha mbaroi! Uluni z. Shalsi. Mbaroi koha juaj!
