Ministrja e Drejtësisë, Etilda Gjonaj tha sot në përfundim të kontrollit të Task-Forcës Antikorrupsion, e cila gjatë kësaj jave ka kryer kontrolle në zyrën Vendore të Regjistrimit të Pasurive të Paluajtshme, Berat, se u konstatuan shkelje të afateve për trajtimin e praktikave dhe përpunimit të kërkesave të qytetarëve të cilat kanë çuar në mohimin e së drejtës për të marrë shërbime në kohë dhe cilësi.
“Bazuar në shkeljet e sipërpërmendura u rekomanduan disa masa disiplinore për punonjësit e kësaj zyre vendore: vërejtje me shkrim për tre përgjegjës sektori, 2 përgjegjës zone, përgjegjësin e sektorit të arkivës dhe administrimit të informacionit, si dhe një specialiste të kësaj zyre”, tha Gjonaj.
Gjithashtu, pas inspektimit, u rekomanduan masa administrative me qëllim përmirësimin e veprimtarisë së zyrës vendore Berat për përmirësimin e cilësisë së shërbimeve të ofruara ndaj qytetarëve.
“Pas inspektimit është depozituar në Prokurorinë e Rrethit Gjyqësor Durrës kallëzim penal për vepra të dyshuara “shpërdorimit të detyrës” si dhe të “pastrimit të produkteve të veprës penale”, të kryera në bashkëpunim, për punonjësit e zyrës vendore të regjistrimit të pasurive të paluajtshme Durrës.
Rezulton se, me veprime apo mosveprime, janë thyer rregullat e parashikuara nga aktet ligjore dhe nënligjore në fuqi për regjistrimin e pasurive të paluajtshme, si dhe nga veprime të cilat kanë çuar në asgjësimin e akteve e kartelave të pasurive të paluajtshme”, deklaroi Gjonaj.
