Ish-ministri i Drejtësisë, Ylli Manjani ka komentuar ftesën për dialog të kryeministrit Rama, drejtuar kreut të PD-së, Lulzim Basha.
I ftuar në “Rtv Ora”, Manjani e konsideron letrën publike të kryeministri Rama një tallje dhe “muhabet kot”, pasi sipas tij ftesa për dialog nuk bëhet me letra publike.
“Është tallje, muhabet kot. Ftesa për dialog nuk bëhet me letra publike, të jemi pak më seriozë. Ftesa për dialog ka një axhendë, ka një tryezë, ka një datë, ka një orë, ka një gjithëpërfshirje, nuk është vetëm Lulzim Basha. Asgjë e sinqertë, një teatër për të kënaqur ndonjë zëvendësambasador apo ambasador.Muhabet kot. Por theksoj se asgjë të keqe nuk ka nga dialogu. Ajo që i duhet vendit sot është një datë zgjedhjesh”, deklaroi Manjani.
Po ashtu, ish-ministri theksoi se e vetmja gjë që duhet të bëj Edi Rama dhe që nuk po e bën, është caktimi i një date zgjedhjesh politike.
“Këtë e ka në dorë Edi Rama, të mos shkruajë letra fare. Nuk ka asgjë në dorë as Presidenti, as opozita. Opozita po bën detyrën e vet, dikujt i pëlqen, dikujt jo por kjo është jeta politike. Fundi i historisë është kjo. Shqipëria ka nevojë për një parlament pluralist, parlamenti pluralist bëhet me zgjedhje, asgjë tjetër.
As me deklarata, as me dialog, as me letra publike dhe as me shtëpi publike. Bëhet fare thjesht duke caktuar një datë zgjedhjesh politike, vendi të hyjë në zgjedhje, ta vendosë populli se kush është përbërja pluraliste e parlamentit. Kjo i duhet Shqipërisë”, tha ish-ministri.
