Kreu i qeverisë Edi Rama ka folur për herë të parë lidhur me dënimin e ish-ministrit të tij të Brendshëm, Saimir Tahiri, ku tha se nuk komenton vendimet e gjykatës.
“Unë nuk komentoj asnjëherë vendimet e gjykatave. E kam ditur mirë se çfarë kam bërë kur kam udhëhequr Reformën në Drejtësi. 100 herë të kthehesha pas, do bëja të njëjtën gjë”, tha ai.
Ish-ministri i Brendshëm, Saimir Tahiri, e kaloi natën në burgun 313, pas vendimit që dha dje Apeli i GJKKO-së duke e dënuar me 3 vite e 4 muaj burg.
Tahiri ndodhet në godinën nr.2 të këtij institucioni të vuajtjes së dënimit. Gjatë natës, ish-ministit të kabinetit qeveritar “Rama”, i janë lejuar në qeli vetëm cigare dhe rroba.
Kush është gjyqtari që futi në burg Tahirin?
Ergert Pëllumbi nuk ka patur bujë të madhe mediatike gjatë karrierës së tij, por ka shënuar në dy raste. Në vitin 2011, ai denoncoi për shpifje n/kryetaren e Kuvendit të Shqipërisë Ermonela Felajn për shpifje.
Në atë kohë, ish-ministrja dhe ish-deputetja socialiste u penalizua me gjobë për shpifje ndaj kompanisë ‘Ferar’, gjatë një konference për shtyp në selinë e PS.
Pëllumbi gjithashtu kaloi me sukses procesin e Vettingut. Komisioni i Pavarur i Kualifikimit votoi unanimisht pro kualifikimit të tij. Gjatë verifikimeve, anëtarët e komisionit nuk gjetën asnjë konstatim të gabuar lidhur me pasurinë e tij.
Anëtarët e komisionit i dhanë “ok” për të vazhduar karrierën në sistemin gjyqësor. Procesi i Vettingut për gjyqtarin Pëllumbi u krye nga trupi gjykues i KPK, i kryesuar nga Pamela Qirko, relator Roland Ilian dhe anëtare Brunilda Bekteshin.
Pëllumbi hyn në historinë e drejtësisë në Shqipëri, duke dënuar një nga ish-funksionarët dhe ish-politikanët më të rëndësishëm në 10 vitet e fundit.
