Përplasja Rusi-Ukrainë është sjellë në fokus nga kryeministri Rama, i cili e ka vënë theksin tek dialogu. Kryeministri Edi Rama ka deklaruar sot, se për çështjen e konfliktit Rusi-Ukrainë, Shqipëria do të jetë në krah me Shtetet e Bashkuara të Amerikës. Kreu i qeverisë gjatë një konference për shtyp, ku shoqërohej nga ministrja e Jashtme, Olta Xhaçka, tha se është marrë konfirmimi që SHBA dhe Shqipëria do të jenë bashkëpenëmbajtëse lidhur me këtë çështje.
“Kemi marrë konfirmimin përfundimtar nga DASH, se SHBA dhe Shqipëria do të jenë bashkëpenëmbajtëse, ky është termi në Këshillin e Sigurimit të Kombeve të Bashkuara, lidhur me çështjen e Ukrainës. Është padiskutim një përgjegjësi e re dhe shumë e madhe, por edhe një konfirmim i një Shqipërie krejt tjetër në arenën ndërkombëtare, i një Shqipërie që vlerësohet për karakterin. Vlerësohet për qëndrueshmërinë, vlerësohet edhe për aftësinë në luajtjen e rolit që i takon si një vend që promovon paqen, që promovon sigurinë”.
Kemi shtim të trupave të SHBA në vende fqinje me Ukrainën si me Poloninë dhe Rumaninë. A ka marrë Shqipëria kërkesë nga NATO për të kontribuar edhe në aspektin ushtarak? A lind nevoja që të udhëtoni drejt Ukrainës me këtë përgjegjësi që keni marrë? A ka shqiptarë në Ukrainë?
Rama: Së pari dëshiroj të theksoj se qëndrimet tona në lidhje me këtë çështje në vijim janë të qarta, të njohura, të pandryshuara. Dëshiroj të theksoj se në këndvështrimin tim, rruga për të adresuar këtë tension që rritet çdo ditë dhe këtë konflikt është rruga e bisedimeve. Rruga e gjetjes së të gjitha arsyeve të mundshme dhe të imagjinueshme për të biseduar, dhe për të kërkuar me durim pikat e përbashkëta edhe pse janë tejet të vështira për tu gjetur. Nga ana tjetër, unë besoj se çdo shqiptar që ndjek ecurinë e Shqipërisë në arenën ndërkombëtare, sot duhet të ndjehet mirë i vlerësuar, pjesë e pikërisht atij komuniteti vlerash. Do kemi mundësi në këto dy vite që të luajmë një rol duke shfrytëzuar peshën e madhe që i jep këtij çiftëzimi SHBA. Shqipëria është shumë e qartë në pozicionin e saj, s’ka pasur asnjëherë asnjë ekuivok, por në atë modestinë e peshës sonë, këtë përballje elefantësh ne sidoqoftë ruajmë të drejtën të themi bisedime.
Pse keni heshtur për letrën e Rusisë?
Rama: Ajo letër si drejtohet vetëm Shqipërisë, por të gjitha vendeve anëtare të NATO-s dhe të OSBE. Asnjë qeveri nuk është marrë me atë letër publikisht, më thoni një qeveri që është marrë me atë letër. Qëndrimet tona janë publike, të qarta, të drejta. S’kemi asnjë problem në marrëdhëniet tona me Rusinë. Rusia nuk është vend armik i Shqipërisë, por kemi ndarje të qartë në këtë pikë. E gjithë zhurma për letrën është pjesë e një zhurme folklorike në katundin e PD.
Ndaj mendimin e shumë të tjerëve që ky është një konflikt goxha i rrezikshëm, dhe tensioni është me potencial të lartë. Bëj pjesë te ai grup njerëzisht që rruga është; bisedime, bisedime, për të gjetur pika shtensionimi dhe për të hapur një proces shumë të vështirë dakordësimesh. Është e komplikuar, por nga ana tjetër ky është një nga ato rastet kur ne jemi si të thuash dhe ndajmë barrën me të mëdhenjtë e kësaj bote, por s’kemi barrën e tyre që është marrja e vendimeve përfundimtare. Konflikti është me potencial rrezikshmërie të lartë.
