Koordinatori për situatën ekonomike, Arben Ahmetaj, mbrëmjen e djeshme është shfaqur i surprizuar kur ka marrë vesh në studion e “Opinion”, se Rama ka shpallur gjendjen e fatkeqësisë natyrore.
Ahmetaj, i cili duhet të jetë zyrtari i dytë më i informuar i qeverisë në lidhje me aktet ligjore dhe pjesën e operacioneve financiare për përballimin e situatës, ka mbetur i shtangur në emisionin “Opinion”. Ai ka marrë vesh shpalljen e gjendjes së fatkeqësisë natyrore në Shqipëri për shkak të Covid-19, në emisionin “Opinion”, ndonëse vendimi është botuar edhe në Fletoren Zyrtare.
PJESË NGA BISEDA:
Ahmetaj: Gjendje e jashtëzakonshme ndoshta?
Fevziu: Ka shumë mundësi
Ahmetaj: Ajo është. Jo gjendje e jashtëzakonshme, por shpallje e fatkeqësisë natyrore
Fevziu: Pra është shpallur tani, për arsye të shkaktuara nga Covid-19
Nga ana tjetër, Partia Demokratike përshëndeti vendimin e qeverisë shqiptare, për shpalljen e gjendjes së fatkeqësisë natyrore. Në reagimin e saj PD thotë se këtë masë e ka kërkuar 5 ditë më parë Lulzim Basha, ndërsa i kërkon qeverisë që të mos humbë asnjë ditë më tepër kohë për masat e kompensimit të dëmeve, procedurat, afatet, strukturat shtetërore përgjegjëse për vlerësimin e dëmeve, si dhe dëmet dhe subjektet që kompensohen.
Numri i të prekurve me Covid-19 në vendin tonë ka shkuar në 123, ndërsa numri i viktimave ka shkuar në 5.
