E premte, 23 Korrik, 2021
23.5 C
Tirana

Superliga/ Katër të parët ndeshen mes tyre, në 17:00 luhen fatet e sezonit

Superliga

Sot, në orën 17:00, Superliga shqiptare shtrihet në 5 terrene njëkohësisht siç e do tradita në javët e fundit të kampionatit për të mos favorizuar apo penalizuar skuadrat që luajnë për të njëjtët objektiva. Nga 10 ekipet që luajnë në kategorinë më të lartë të futbollit shqiptar vetëm Apolonia ka rënë matematikisht nga kategoria. Për trofeun luftojnë 4 prej tyre, ndërsa për Europën janë 5 konkurrentë, pra gjysma e pjesëmarrësve.

Dita e sotme, java e 35-të nga 36 që ka kampionati ynë, mendohet se do të ndajë shapin nga sheqeri megjithëse diferencat janë aq të vogla sa dhe java e fundit pritet të jetë vendimtare në çdo plan.

Një labirint i veçantë ky i sotmi në kampionatin shqiptar pasi dy ekipe me nga 60 pikë, vendi i 3-të dhe i 4-t, sfidojnë dy ekipet para tyre që kanë nga 62 pikë.

Partizani-Vllaznia

Partizani-Vllaznia është ndeshja me vëmendjen më të madhe mbi vete e javës së 35-të. Luan e para me të dytën dhe mund të vendosë titullin kampion, të paktën ‘de facto’. Partizani sapo ka marrë kreun dhe i mjafton të fitojë vetëm dy ndeshje pasi mundi rivalët direktë Teutën për t’i marrë kreun. I duhen vetëm dy fitore por Vllaznia nuk është kockë e lehtë pasi jo vetëm që lufton edhe ajo për titullin dhe me një fitore bëhet pretendenti kryesor, por edhe për faktin se Vllaznia e këtij sezoni është një ekip ndryshe, një ekip që u shkëput 9 pikë nga vendi i dytë në mes të sezonit dhe një ekip që luan shumë mirë i organizur në fushë. Vllaznia do të ishte dhimbje koke jo vetëm për Partizanin por për çdo ekip në kampionat. Ndeshja luhet në ‘Air Albania’ dhe pritet të jetë nyja gordiane e këtij sezoni përsa i përket titullit kampion.

Laçi-Teuta

Poashtu një ndeshje thelbësore për fatet e këtij sezoni. Vendi i parë dhe kupar e Europës marrin përgjigje edhe nga sfida e Laçit sot. Vendasit të ndodhur në pozitat e Vllaznisë, dy pikë poshtë kreut, me një fitore shkojnë të dytët pavarësisht se si del ndeshja në Tiranë. Në rast barazimi, si kurbinasit ashtu dhe durrsakët do të humbnin në përqindje të lartë shanset për sukses, prandaj barazimi nuk i bën punë asnjërit. Nëse Teuta fiton, veshët nga Tirana në pritje të një nderi nga Vllaznia e Shkodrës, kështu do të rimerrte vednin e parë me një javë për t’u luajtur.

Lexo edhe :   Conference League/ Partizani luan në Bazel, Teuta favorite, Drita me Fejenordin

Kastrioti-Bylis

Takimi i tretë për nga rëndësia diteën e sotme. Akti zhvendoset për në skenën e zonës së ftohtë, aty ku përcaktohet kush i bashkangjitet Apolonisë në rënie nga kategoria dhe kush luan ndeshjen shtesë në shtëpi për të mbijetuar. Kastrioti ka një pikë më shumë se Bylisi dhe e pret në shtëpi, një fitore e krutanëve dhe gjithçka mbyllet, Bylisi bie në Kategorinë e Parë. Barazimi e shtyn betejën për në ndeshjen e fundit. Bylisit nga ana tjetër i duhet një fitore për të kthyer monedhën.

Lexo edhe :   Conference League/ Partizani luan në Bazel, Teuta favorite, Drita me Fejenordin

Skënderbeu-Kukësi

Jo shumë larg në kohë, Skënderbeu-Kukësi ishte sfida që ndante kampionin dhe nënkampionin për disa sezone rradhazi në Shqipëri. Sot, Kukësi nuk ka asnjë objektiv dhe vjen në ndeshje si vendi i 6-të pasi e ka betonuar javë më parë. Skënderbeu, në një sezon si kurrë më parë këtë dekadë, duhet ende të luftojë për të mos rënë nga kategoria. Ndeshja e sotme mund t’i sjellë fund ankthit në kampin korçar pasi ndodhet 3 pikë nga Kastrioti dhe 4 nga Bylisi. Një fitore e shpëton automatikisht Skënderbeun ndërsa kombinimet e mundshme me ndeshjen e Krujës e nxjerrin në të shumtën e rasteve të avantazhuar.

Apolonia-Tirana

Dy ekipe pa objektiva përballen në Fier për të respektuar kampionatin. Apolonia e talenteve fierakë nuk ia doli përballë vështirësisë së superiores dhe prej javësh luan për respekt. Tirana e Shehit është e pesta. Shanset për Europë sezonin tjetër kanë humbur. Luhet për statistika. / Totila Kotorri/Tirana Today

- Reklama -

Më shumë nga kategoria




Të fundit

KPK, pikëpyetje për pasurinë dhe profesionalizmin e prokurores Daniela Sulaj

Prokurorja Daniela Sulaj, e komanduar si inspektore pranë Inspektoriatit të Lartë të Drejtësisë, u përball të premten më 23 korrik me Komisionin e Pavarur...

Gjykata i refuzon kërkesën për liri, Hashim Thaçi mbetet në paraburgim

Gjykata Speciale e Hagës ka marrë vendim që t’i refuzohet kërkesa ish-presidentit të Kosovës, Hashim Thaçit, që ky i fundit të mbrohet në liri. Edhe...

Koronavirusi, Manastirliu tregon numrin e të vaksinuarve në 24 orët e fundit

Ministrja e Shëndetësisë dhe Mbrojtjes Sociale, Ogerta Manastirliu ka publikuar shifrat e të vaksinuarve kundër koronavirusit në vend. Manastirliu bën me dije, se mbi 13...

SHBA/ Sulmuesi realizon euro gol nga mesfusha (Video)

Në ndeshjen midis Karolinës së Veriut me Riçmond Kikers e përfunduar me rezultatin 4-0 për skuadrën vendase, është realizuar një supergol nga gjysmëfusha. Sulmuesi Robert...

A do të lëkunden raportet turko-serbe pas deklaratës së Erdogan për Kosovën?

“Në qoftë se kushdo sjell vendim për njohjen e Kosovës si të pavarur, në të njëjtin moment ne do të nisim fushatën për tërheqjen...