Më shumë se një e treta e fëmijëve pozitivë me Covid-19 janë asimptomatikë, sipas një studimi të Universitetit të Albertas në Kanada, që sugjeron se të rinjtë e diagnostikuar me këtë sëmundje, mund të përfaqësojnë vetëm një pjesë të atyre që janë të infektuar.
“Shqetësimi nga këndvështrimi i shëndetit publik, është se ka ndoshta shumë fëmijë me Covid-19 që qarkullojnë në komunitet, dhe njerëzit as që e kuptojnë këtë”-thotë Finlej Mekalister, profesor i mjekësisë në Fakultetin e Mjekësisë dhe Stomatologjisë.
“Kur shohim raporte të 1.200 rasteve të reja në ditë në provincën e Albertës, kjo ka të ngjarë të jetë vetëm maja e ajsbergut. Ka shumë gjasa që shumë njerëz nuk e dinë që janë prekur nga ky virus, dhe që potencialisht po e përhapin atë në masë”- thekson ai.
Për studimin në fjalë, ekipi i Mekalister analizoi rezultatet 2.463 fëmijëve që u testuan gjatë valës së parë të pandemisë -nga mars deri në shtator – për infeksionin e Covid-19. Prej tyre,1.987 fëmijë kishin rezultuar pozitivë në testin e tamponit, dhe vetëm 476 patën një rezultat negativ. Nga fëmijët që rezultuan pozitivë, 714 ose 35.9 për qind, raportuan se ishin asimptomatikë.
“Kjo dukuri ka të bëjë shumë me protokollet e sigurisë nëpër shkolla. Ne mund të bëjmë të gjithë pyetësorët mbi Covid-19, por nëse një e treta e fëmijëve janë asimptomatikë, përgjigja do të jetë jo ndaj të gjitha pyetjeve – megjithatë ata janë ende të infektuar”- thekson ai.
Për shkak të natyrës asimptomatike të sëmundjes deri në një të tretën e fëmijëve, Mekalister tha se rajoni kishte të drejtë të mbyllte shkollat për një periudhë më të gjatë gjatë përtej Krishtlindjeve.“Me sa dimë deri tani, fëmijët kanë më pak të ngjarë që ta përhapin sëmundjen sesa të rriturit, por rreziku nuk është zero. Me sa duket shpërndarësit asimptomatikë janë më pak infektivë,sesa personi që rri ngjitur pas të tjerëve dhe teshtin përballe fytyrave të tyre. Por sërish, nuk e dimë me siguri këtë gjë”- thotë më tej ai.
Gjithashtu studiuesit zbuluan se megjithëse kolla, sekrecionet e lëngshme në hundë dhe dhimbja e fytit, ishin 3nga simptomat më të zakonshme midis fëmijëve me infeksion e Covid-19 – që shfaqeshin përkatësisht në 25, 19 dhe 16 për qind të rasteve – ato ishin në fakt pak më të zakonshme midis atyre që kishin rezultate negative të testit të Covid-19.
“Sigurisht, fëmijët janë në rrezik të preken nga shumë viruse të ndryshme. Prandaj simptomat specifike të Covid janë në fakt më tipike,si humbja e shijes dhe nuhatjes, dhimbja e kokës, ethe, të përzierit dhe të vjellat, dhe jo hunda e lëngshme, kolla dhe dhimbja e fytit”- deklaron Mekalister.
Studiuesi vë në dukje se grupi i tij ka kryer një studim të ngjashëm, që tregon se dhimbja fytit dhe rrjedhja e hundëve nuk janë shenja të besueshme të Covid-19 tek të rriturit, edhe pse shumica dërrmuese e të rriturve (84 për qind) shfaqin simptoma.
“Dhimbja e fytit dhe rrjedhja e hundës, do të thotë që mund të keni një lloj infeksioni të traktit të sipërm respirator. Por ethet, dhimbja e kokës dhe humbja e shijes apo nuhatjes, janë ato që tregojnë se dikush mund të jetë me Covid-19”-nënvizon Mekalister.
Ai shton se nëse njerëzit nuk kanë asnjë simptomë fare, ata duhet të qëndrojnë në shtëpi dhe të testohen, ndërsa edhe ata që ndihen mirë duhet të bëjnë gjithçka që munden për të qëndruar të sigurt – të mbajnë një maskë mbrojtëse, të lajnë shpesh duar, të mbajnë distancë, dhe të shmangin takimet në ambiente të mbyllura.
Burimi i lajmit: https://www.eurekalert.org/pub_releases/2020-11/uoaf-mto112720.php
Përshtatur nga TIRANA TODAY
