Në çelje të Kuvendit të thirrur nga ish-kryeministri Sali Berisha, i pari që do të mbajë fjalën hapëse do të jetë deputeti i PD-së, Edi Paloka.
Do jenë rreth 20 persona që do të flasin në këtë Kuvend, ku padyshim momenti më i veçantë do të jetë fjalimi i ish-kryeministrit Sali Berisha.
Figura politike të Partisë Demokratike që ndër vite kanë mbajtur pozicione të larta në qeveri dhe detyra shtetërore, do të mbajnë fjalime, që në fund do të kulmojë me atë të ish-kryeministrit Sali Berisha. Ky i fundit prej 3 muajsh nisi aksionin e tij kundër Lulzim Bashës përmes “Foltores”, për rithemelimin e PD-së dhe për shkarkimin nga drejtimi i kësaj partie të kryetarit.
Më shumë se 4500 delegatë kanë firmosur për mbajtjen e këtij Kuvendi. Ky forum pritet që të marrë sot disa vendime të rëndësishme, ku pritet shkarkimi i kryedemokratit Lulzim Basha dhe votimet e disa ndryshimeve në statutin e partisë.
Në stadium janë vendosur gjithashtu banderolat me sloganin e njoftuar më parë, nga Berisha “Kuvendi Kombëtar i Partisë Demokratike, më të bashkuar, më të fortë, më të hapur”.
Ndërsa pjesëmarrësit në një zë brohorasin “Luli ik, Basha ik”.
Të pranishëm në Kuvend janë deputetët Tritan Shehi, Agron Shehja, Oerd Bylykbashi, Bujar Nishani, Gent Strazimiri, Agron Kuliçaj, Klevis Balliu, Albana Vokshi, Belind Këlliçi etj.
Organizatorët e PD-së nuk kanë lejuar gazetarët që të hyjnë në vendin ku qëndrojnë delegatët. Pas një vendimi të dytë, gazetarët janë lejuar që të futen, por më pas diçka ka ndryshuar dhe janë njoftuar të lënë ambientet e stadiumit. Kuvendi do të transmetohet nga një regji qendrore.
