Kryeministri Edi Rama i është përgjigjur me të njëjtën ‘monedhë’ kryetarit të opozitës, Lulzim Basha, i cili deklaroi se rivali politik e ndjek në konferencat e tij. Rama tha se qeveria e djeshme, nuk i ka realizuar punët si në letër.
“Shkoni pyesni në fshat, sa paguheshin dje, sa paguajnë sot. Kemi financuar pa krahasim ujitje-kullimin. Po i bie kësaj të mos ndjell diçka që s’duhet. Shirat që dje përmbysnin, sot jo. Flas për reshje relative, jo për ato që përmbysin dhe Francën. Se punët s’janë bërë siç thuhet në letër nga ata që qajnë hallet e popullit sot, qajnë 6 në 4”, tha Rama, duke i rikujtuar Bashës lapsusin e bërë dje prej tij.
Basha, teksa fliste për dështimin e qeverisë me shëndetësinë, sqaroi edhe gafën e një dite më parë ku u shpreh se “6 në 4 biznese nuk nxjerrin fitim”.
“Tradhtoi veten e tij dje. E kishte ndjekur konferencën për shtyp, por ishte marrë me lapsusin tim. Herën tjetër do ta nxjerr unë atë, kur të bëj lapsus. Nuk ka rëndësi nëse bëj një apo dy lapse/lapsuse.
Ajo shifër është 6 në 10 biznese sipas BB. Ja pra që i dëgjoka fjalët e mia, por jo për të ndihmuar shqiptaret. Ka cinizmin kriminal që mos t’i përgjigjet as kërkesave elementare për t’i ardhur në ndihmë këtyre. Meqë e dëgjon konferencën për shtyp, po ia përsëris dhe njëherë sot planin me 5 pika, dhe po i them ti vërë gishtin kokës. Të mos merret me cic-mice, gërr-vërret. Është pjesë e reumatizmës politike që e ka zënë”, tha Basha.
