Për të parandaluar një valë të dytë të pandemisë, në Shqipëri do duhet që banorët të mbajnë maskën në mjedise publike. Detyrimi për mbajtjen e maskës në mjetet e transportit publik nuk është kontrolluar me imtësi, dhe shpesh qytetarët kanë abuzuar. Por Rama e tha shkurt dhe qartë sot, se kjo masë vjen për të shmangur një mbyllje të dytë, e cila nuk do ti shërbente askujt.
Pas 15 tetorit, të gjithë qytetarët pa përjashtim do të lëvizin duke mbajtur maskën, e po kështu të kenë me vete një mjet identifikimi me vete. Kjo është e detyrueshme, pasi në rast se një qytetar kapet në shkelje, policia e identifikon e më pas me ndihmën e databases së OSHEE të gjendet se në cilën kontratë të faturohet gjoba.
Nëse mendoni se do ia hidhni paq, se nuk keni një mjet identifikimi me vete, atëherë këtu gaboheni. Në rast se shkelësi nuk ka me vete mjet identifikimi dhe është mbi 18 vjeç, ai do të shoqërohet në komisariat, raporton “News24”. Për minorenët, policia do të veprojë me këshillime.
Qytetarët që do të konstatohen pa maskë do të gjobiten me 3 mijë lekë të rinj. Në rast përsëritje të shkeljes, gjoba rritet në mënyrë progresive 6, 9, 12 mijë lekë e kështu me radhë.
Në faturën e energjisë elektrike do të jetë e shkruar se cili person ka kryer shkeljen, duke shkruar gjeneralitetet dhe numrin e kartës së identitetit, që do t’i kërkohet çdo shkelësi në rrugë apo në ambiente të tjera.
Situata në vendin tonë është e rëndë, ndërsa kryedemokrati Basha dha sot alarmin se spitalet janë tejmbushur me persona të infektuar. Po kështu, në bilancin ditor, numri i pacientëve që nuk ia dalin dot mbanë është sërish i lartë.