Një automjet tip BMW është përfshirë nga flakët e zjarrit. Ngjarja ka ndodhur në lagjen Nr.15 në Durrës, rreth orës 03:30. Pronari i mjetit tip ‘BMW’, gjatë dëshmisë së dhënë në polici është shprehur se nuk ka patur konflikte me asnjë person.
“Nuk kam pasur asnjëherë konflik me njeri. Momentalisht nuk dyshoj te askush”, mësohet të jetë shprehur pronari i mjetit. Makina në pronësi të shtetasit R.Xh., u dogj tërësisht, ndërsa nga ngjarja ka vetëm dëme materiale dhe asnjë person të lënduar.
Në polici janë shoqëruar disa persona të dyshuar, të cilët mund të kenë dijeni për ngjarjen. Personat që kanë kryer aktin janë filmuar duke mbajtur në dorë bidona me benzinë, të cilat i kanë përdorur për të djegur mjetin.
Kamerat e sigurisë të bizneseve pranë vendngjarjes kanë kapur dy persona, të cilët ishin të veshur me kapuç dhe kanë spërkatur makinën me benzinë duke i vënë flakën, raporton “dosja.al”
Si provë materiale policia ka evidentuar bidonat të cilët janë gjetur në oborrin e shtëpisë. Policia ka shoqëruar për në komisariat disa persona, të cilët dyshohen se mund të jenë autorët e ngjarjes. Policia nuk përjashton mundësinë e ndonjë konflikti që pronari i makinës mund të ketë me ndonjë person.
