Spanja ishte vendi i parë evropian më i goditur nga koronavirusi. Duke analizuar situatën e ku humbjet ekonomike janë në nivele të frikshme, biznesmenët e kanë parë të arsyeshme që të nxjerrin në shitje bizneset. Më konkretisht bëhet fjalë për hotelet, pasi ekonomia e Spanjës është shumë e varur nga turizmi.
Numri i hoteleve që janë nxjerrë në shitje në Spanjë është rritur me 19% në tetor krahasuar me marsin. Këto janë të dhënat e publikuara nga portali kryesor i pronave Idealista. Në ishujt Balearik, numri i hoteleve në shitje u rrit 84% gjatë kësaj periudhe, ndërsa për Andaluzinë rritja ishte 45%. Në përgjithësi, 557 hotele ishin në shitje në vend që nga tetori, 101 prej tyre në Katalonjë, raportoi Idealista.
Pothuajse një e treta e hoteleve spanjolle u mbyllën në tetor, sipas të dhënave nga Instituti Kombëtar i Statistikave i Spanjës. Rezervimet e regjistruara të hoteleve ishin 83% më të ulëta muajin e kaluar, se e njëjta periudhë e vitit të kaluar, treguan të dhënat zyrtare më herët këtë javë.
Spanja ra në recesionin më të thellë në historinë e saj. Sektori i rëndësishëm i turizmit në veçanti, është i paralizuar në shumë vende. Midis prillit dhe qershorit, në shumë sektorë humbën një milion vende pune – më shumë se kurrë në një tremujor.
