Rreth 480 mijë nxënës në sistemin parauniversitar në të gjithë vendin, sot do të nisin vitin e ri shkollor. Mësimi ka nisur në orën 08:00, dhe orët do të jenë nga 30 minuta, si një masë e marrë për të reduktuar qëndrimin në një ambient të mbyllur për orë të gjata.
Nxënësit duhet të respektojnë distancimin social, të mbajnë maskat si dhe ambientet duhet të ajrosen vazhdimisht. Në shkollat ku është e pamundur të respektohet distancimi social, mësimi do të zhvillohet me turne.
Sikundër është njoftuar edhe më herët nga Ministria e Shëndetësisë dhe kryeministri Rama, mësuesit do të rikthehen në klasa të vaksinuar. Për ata që nuk e bëjnë, do të duhet të paraqesin test COVID çdo javë, për të treguar se nuk janë të infektuar nga virusi.
