Për Partinë Socialiste është një ditë e veçantë, pasi mbush 28 vite nga themelimi i saj. Një ditë po kaq me rëndësi është edhe për Partinë Demokratike, pasi kreu i saj, Lulzim Basha, feston ditëlindjen. Basha mbush sot 45 vjeç.
Le ta quajmë interesant detajin që PS dhe Basha festojnë ditëlindjen në të njëjtën ditë. Por, pavarësisht kësaj duket se festimet nuk ndjehen, ndërsa ndodhemi në kushtet e një krize që ditët e fundit është thelluar edhe më shumë.
Kreu i grupit socialist, Taulant Balla ka uruar ditëlindjen e partisë, por nuk dha më shumë detaje për ndonjë organizim të mundshëm.
“12 Qershor
Gëzuar ditëlindjen e 28-të Partisë Socialiste? të Shqipërisë, forcës më të madhe politike të shqiptarëve, e cila sot drejton Shqipërinë tonë në përpjekjen europeiste për të ndërtuar dhe forcuar shtetin modern të së drejtës, sundimin e ligjit dhe parimet e mirëqenies sociale.
Partia Socialiste e Shqipërisë është sot forca politike më e besueshme për partnerët ndërkombëtarë të Shqipërisë, në angazhimin e saj qeverisës, demokratizues dhe reformator.
Sot teksa afron 30 Qershori i Zgjedhjeve Vendore, konfirmohet qartë se misioni historik i Partisë Socialiste të Shqipërisë në gjithë rrugëtimin e saj ka qenë dhe mbetet një shtet shqiptar me institucione funksionale, ku respektimi i Kushtetutës dhe i ligjit është detyrim i zbatueshëm dhe i barabartë për çdo shtetas shqiptar.
Urime të gjithë anëtarëve të Partisë Socialiste!”, shkruan ai në Facebook.
Nga ana tjetër, ende nuk ka asnjë detaj se ku do të festojë Basha.
