Shefi i Delegacionit të Bashkimit Evropian në Tiranë, Luigi Soreca, gjatë një aktiviteti informues në lidhje me “Za Fest”, një festival që do të zhvillohet në zonat malore të Veriut të Shqipërisë, tha se çështja për Teatrin është politizuar ndjeshëm. Ai ka theksuar se janë autoritetet shqiptare ato që vendosin për shembjen apo jo të godinës ekzistuese. “Kjo çështje është shumë e rëndësishme, pjesë e një debati intensiv që po bëhet në shoqërinë shqiptare, që janë përfshirë shumë ndjesi, ndjenja, dhe është një çështje delikate por edhe e politizuar.
Nuk na takon ne që të themi nese duhet të ketë një ndërtesë të re apo rinovim të ndërtesës së vjetër, këtë e thanë autoritetet shqiptare. Pozicioni ka qenë mjaft i qartë që nga shtatori i vitit të shkuar”, ka thënë Soreca.
Sipas tij, ligji dhe sundimi i shtetit ligjor është parimi ku duhet të bazohen autoritetet shqiptare, në marrjen e vendimit të duhur. “Është lancuar tender, kritere të qartë dhe transparente për këtë projekt, dhe po ashtu të ketë një qasje të drejtë dhe të ndershme në lidhje me këtë çështje. Mendoj që kjo është një çështje e cila vazhdon të ketë debat të madh në Shqipëri.
Për ne, siç e thashë, është e rëndësishme të respektohet sundimi i ligjit. Procedurat e tenderit të jenë në përputhje me ato të BE, tenderi është i hapur deri në shtator, e rëndësishme është çështja e konkurrencës së lirë dhe të drejtë, dhe ai të jetë i hapur deri në 19 shtator”, tha ambasadori i BE-së.
