Skandali me sanitaren, vjen reagimi i parë nga Rama

Edhe kryeministri Rama ka shprehur indinjatën lidhur me rastin e abuzimit të sanitares. Nga qendra e re Shëndetësore Nr.1, Tiranë, Rama jep mesazhin se ky është një akt i shëmtuar, por në asnjë mënyrë nuk mundet ta përbaltë trupën e denjë të bluzave të bardha.

Sipas kreut të qeverisë, çdo pyll ka derrat e vet, po kurrsesi ata që abuzojnë me bluzën e bardhë nuk janë shumica dërrmuese e mjekëve dhe infermierëve të përkushtuar.

Gjykata e Tiranës ka caktuar sot masën e sigurisë “Arrest me Burg” për Tire Alldervishin, sanitaren e spitalit “Shefqet Ndroqi” që u hoq si infermiere për të marrë ryshfet nga familjarët e një pacienteje me koronavirus. Alldervishi akuzohet për mashtrim më shumë se një herë, ndërsa gjykata i ka bërë thirrje prokurorisë të kryejë hetime të thelluara.

Statusi

Qendra e Re Shëndetësore Nr.1, Tiranë – Një tjetër qendër shëndetësore e transformuar rrënjësisht në zinxhirin e 300 qendrave të reja shëndetësore me standarde europiane, në vend të karakatinave 50 e 60 vjeçare ku personeli shëndetësor dhe qytetarët, vuanin bashkarisht mungesën e kushteve!

***dhe një mesazh mbi aktin e shëmtuar të sanitares së ekspozuar nga gazetarët investigativë të emisionit STOP, të cilët meritojnë falenderim e respekt për kontributin e tyre në prangosjen e një personazhi të turpshëm, që në asnjë mënyrë nuk mundet ta përbaltë trupën e denjë të bluzave tona të bardha – çdo pyll ka derrat e vet, po kurrsesi ata që abuzojnë me bluzën e bardhë nuk janë shumica dërrmuese e mjekëve dhe infermierëve të përkushtuar shqiptarë

#PunëJoGjumë