Kreu i qeverisë rimblodhi qeverinë, ku u shpreh se ka nisur pastrimi në Durrës e Thumanë nga ndërtesat e rrënuara. Po kështu ai dha urdhër, se deri nesër duhet të jetë gati një paketë speciale e drejtpërdrejtë për të gjitha familjet, ku ka jetë të humbura. Ai ndau edhe punët e ministrave në terren.
Rama ka vendosur si drejtuesin kryesor për qarkun Durrës ministrin Bledi Çuçi, dhe u shpreh se fjala e tij është urdhër për të tjerët. Duke bërë një rezyme të asaj se çfarë ka ndodhur, ai tha se është bërë shembja e godinave të rezikshme në Thumanë. Në Durrës ka nisur puna për pastrimin e gërmadhave, ku nuk ka më operacion kërkim-shpëtimi. Mjaft i prerë në qëndrimin e tij, Rama deklaroi se Çuçi është drejtuesi qëndror, dhe urdhrat e tij duhet të zbatohen të gjitha.
“Ka filluar puna për pastrimin e hotspoteve në Durrës dhe Thumanë. Është bërë shembja e godinave të rrezikshme në Thumanë, ku ishim mbrëmë deri vonë. Po ashtu edhe në Durrës ka nisur puna për pastrimin e gërmadhave, ku nuk ka më operacion kërkim-shpëtimi.
Të gjitha familjet që kanë humbur njerëz duhet të jenë të listuar, sa të rritur kanë në punë, sa të moshuar. Për këta duhet një paketë speciale e drejtpërdrejtë, kjo duhet nesër.
Më 29 nëntor, Komiteti vendosi caktimin e Bledi Çuçit si drejtues qendror të fatkeqësive natyrore në qarkun e Durrësit, ministrin Bledi Çuçi. Rovena Vodën, për qarkun Durrës për çështjen operacionale. Të gjithë ju që jeni në tavolinë, pastaj edhe të gjithë të tjerët jeni të detyruar, nuk jeni të lutur që të jeni në dispozicion të drejtuesve qëndror.
Mandati i zotit Çuçi është fuqiplotë, dhe për këtë temë ai është ministri fuqiplotë, të tjerët në dispozicion. Mos kemi llafe dhe zvarritje, kryesore është Çuçi drejtuesi qëndror dhe çfarë vjen nga zyra e tij, atëherë të ndiqen të gjitha ato që kërkon një për një”, u shpreh Rama para ministrave.
