Kryeministri Edi Rama ka folur në lidhjen me mënyrën se si e ka përballuar Italia situatën e krijuar nga koronavirusi.
Në një lidhje të drejtpërdrejtë me emisionin “Provokacija”, Rama tha se në Itali ka ndodhur ajo që do kishte ndodhur në çdo vend, nëse s’do ishin marrë masa kufizuese paraprake.
Sipas tij, masat në Itali duhet të ishin marrë më shpejt. Kreu i qeverisë shtoi se nuk duhet pritur që të rritet numri i të infektuarve dhe më pas të veprohet. Kryeministri shtoi se mbyllja e aktiviteteve masive duhej të ishte bërë sa më parë.
Pjesë nga intervista:
Sipas jush çfarë ka ndodhur në Itali? Kurrë nuk e kisha imagjinuar që t’i shihja italianët të gjunjëzuar?
“Ka ndodhur ajo që mund t’i ndodhë çdo kujt. Shikoni Spanjën e cila ka hyrë në të njëjtin tynel. Shikoni Nju Jorkun që sapo ka hyrë në të njëjtin tunel. Shpejtësia e përhapjes ka qenë më e madhe. Marrja e masave nuk është bërë me shpejtësi”.
A do ta kritikonit kryeministrin Conte?
“Jo nuk do ta kritikoja aspak, por mendoj që masat duhet të ishin marrë më herët. Por, Italia ka një sistem të ndryshëm nga i joni. Ka ca shtresa qeverisjeje. Guvernatorët që bëjnë secili në kokën e tyre. Kryetarët e bashkisë secili në kokën e tyre. Por të gjithë ekspertët thonë se pas shfaqjes së virusit në territor , çdo ditë është shumë e shtrenjtë. Ti nuk mund të rrish dhe të thuash, ja po ta shtymë edhe një çikë , jo po çfarë janë 20 raste. Sepse rritja është eksponenciale. Mbyllja e aktiviteteve masive duhej të ishte bërë më parë. Më kujtohej se miqtë e mi më dërgonin foto nga party-t e tyre anti-korona… Ne do të ishim në të njëjtën situatë nëse nuk do t’i kishim marrë këto masa”.
