Simptomat e të ftohurit
Nëse thjesht jeni ftohur, ka të ngjarë të nisni të keni dhimbje fyti 1 ose 2 ditët e para. Më pas nis bllokimi i hundës nga sekrecionet. Më pastaj nis kolla. Është diçka e rrallë, që një i rritur me ftohje të ketë edhe ethe. Është gjithashtu e pazakontë të ketë dhimbje trupi, koke apo të dridhura. Simptomat e të ftohurës, zgjasin zakonisht për rreth 1 javë. Nëse nuk zbuten pas 1 jave, bëni mirë të vizitoheni tek mjekun tuaj, për të parë nëse keni zhvilluar ndonjë infeksion bakterial, çka do të thotë se keni nevojë për antibiotikë. Ose mund të vuani nga alergjitë e stinës.
Simptomat e gripit të zakonshëm
Zakonisht ato janë më të rënda, dhe shfaqen më shpejt sesa simptomat e ftohjes. Simptomat e gripit përfshijnë ethet, të dridhura, kollën, dhimbjet e fytit, kokës dhe ato muskulore. Nëse jeni prekur nga gripi mund të keni edhe të teshtitura, dhe një hundë të bllokuar nga sekrecionet.
Simptomat e gripit, zgjasin për një kohë të gjatë, por shumica nisin të zbuten pas 2-5 ditëve të para. Por nuk është e pazakontë të ndjeheni keq për një javë ose më gjatë. Lodhja dhe dobësia trupore, mund të zgjasin ndonjëherë me javë pas largimit të simptomave të tjera.
Simptomat e koronavirusit
Ato mund të variojnë nga të buta deri në të rënda. Sipas ekspertëve, simptomat më të zakonshme të koronavirusit janë ethet, kolla e vazhdueshme dhe vështirësia e madh në frymëmarrje. OBSH thotë se simptomat e zakonshme mund të përfshijnë edhe ndjesinë e lodhjes fizike. Por disa njerëz gjithashtu mund të kenë dhimbje koke, bllokim hundësh, dhimbje fyti apo diarre. Simptomat nisin të shfaqen gradualisht dhe janë të buta. Ato mund të zhvillohen për 2-14 ditë. Rreth 80 për qind e njerëzve shërohen nga sëmundja, pa pasur nevojë për trajtim. Më të rrezikuar mbeten të moshuarit, dhe të sëmurët kronikë.
/TIRANA TODAY
