Gazetari Enkel Demi, i ftuar sot në emisionin “Dita Jonë”, deklaroi se filozofia politike e kryeministrit Rama është anarkia, dhe se ai po shkatërron strukturat bazë të PS-së. “Për mua kur u bë kryetar partie ishte gjë e shkëlqyer, tani është e rrezikshme”.
Demi ka zbuluar edhe një anekdotë të së kaluarës. Në kohën kur Rama ishte kryebashkiaku i Tiranës, i pyetur nga ai vetë për arsyet për të cilat nuk anëtarësohej në PS përgjigjej: “Si mund të rri unë te ajo partia e komunistëve, si mund të rri unë me Gramoz Ruçin?”.
Duke komentuar mundësinë e ekzistencës të një rryme kundër Ramës brenda Partisë Socialiste, gazetari i njohur mendon se kjo mund të jetë e mundshme, sepse “është një çështje pushteti, ai nuk ka ndarë pushtetin”, që konfirmon faktin se kryeministri Rama “çdo gjë ka dashur në këtë botë, përveç Partisë Socialiste”.
Po kështu, një koment ka dhënë edhe për lëvizjet e opozitës së bashkuar, me theks të veçantë mbi kryedemokratin Basha. Gazetari është i mendimit se Basha tashmë është vënë në veprim.
