Gazetari investigativ, Artan Hoxha, ka trajtuar rastin e hetimeve sa i takon fenomenit të kanabisit. Ai tha se ka qenë në dispozicion të hetimeve, dhe se i ka dalë për Zot vetes. “Si këtë vit nuk ka bërë vaki”, tha Artan Hoxha në studion e “ABC”-së në lidhje me fenomenin e kanabisit dhe thirrjet nga prokuroria për të dëshmuar për videot nga parcelat që ka denoncuar.
Mjaft i drejtëpërdrejtë në qëndrimin e tij, ai lëshoi një sërë kritikash edhe ndaj presidentit. Ai u shpreh se detyra e tij është që informoj publikun, dhe të denoncoj fenomenin. Por se nuk është hetues dhe as prokuror. Hoxha shtoi më tej se është e papranueshme që të mos ketë një reagim nga ana e kreut të shtetit, Ilir Meta, për lirinë e medias.
“Nuk më ka bërë vaki ndonjëherë që të jem në dispozicion të hetimeve si këtë vit. Ku nuk më kanë çuar për të dhënë deklarimet. Detyra ime është të informoj publikun, dhe të denoncoj fenomenin. Nuk jam as hetues, dhe as prokuror.
Prokuroria vjen merr videon, unë e kam dhënë dëshminë time dhe vazhdon procedimin, nuk thërret personin. Kam qenë në 6 seanca hetimesh nga jugu në veri, dhe në asnjë rast nuk kam kërkuar ndihmë, i kam dalë për Zot vetes. Por nuk kam parë të reagojë presidenti për lirinë e medias dhe mbrojtjen që del e na mbron medemek kur i do qejfi, dhe në këtë rast nuk del kur ka të bëjë me një fenomen kur thotë jemi para vitit elektoral dhe këto do të përdoren.
Zotëri ke dalë në fund të dhjetorit, ku ishte në maj, qershor, korrik, gusht, nëntor, kur kam nxjerrë pamjet? Ku ishin autoritetet kur t’u vranë njerëzit në Malësi të Madhe dhe nuk i gjenin për një javë. Do të flasin kur të vijë fushata, do ta përdorin politikisht, dhe ky fenomen do të përsëritet, se nuk do të kemi drejtësi por përdorim politik”, tha Hoxha.
