Kryetarja e bashkisë së Shkodrës, Voltana Ademi ka reaguar në lidhje me verifikimin e 2 rasteve të reja me koronavirus në Shkodër sot.
Përmes një postimi në Facebook, Ademi tha se bëhet fjalë për një personel të Reanimacionit në Spitalin e Shkodrës dhe një personel të FNSH-së.
Ajo i bën thirrje qeverisë që të testohen për COVID-19 të gjithë personave që janë në terren çdo ditë: Personelin shëndetësor në të gjitha institucionet e nivelet; Policinë e Shkodrës; Forcat e Ushtrisë; Personat që punojnë e veprojnë në territor në asistencë e mbështetje të shtresave më në nevojë.
Sipas saj, testimi bashkë me distancimin fizik e social janë e vetmja rrugë për të frenuar përhapjen e virusit vdekjeprurës.
Postimi i plotë:
Sot, fatkeqësisht, janë regjistruar dy raste të reja të personave të infektuar me COVID-19 në institucionet që Shkodër.
Është një personel i Reanimacionit në Spitalin e Shkodrës dhe një personel i FNSH-së Shkodër.
Përsëris edhe një herë apelin tim publik për marrjen e masave shtesë për shërbimin dhe parandalimin e përhapjes së COVID-19, kërkesë testim me URGJENCË të personave që janë në terren çdo ditë:
-Personelin shëndetësor në të gjitha institucionet e nivelet
-Policinë e Shkodrës
-Forcat e Ushtrisë
-Personat që punojnë e veprojnë në territor në asistencë e mbështetje të shtresave më në nevojë.
Është jetike që kjo të bëhet sa më shpejt të jetë e mundur sepse COVID-19 po përhapet në institucione të rëndësishme si ato të shëndetit dhe ruajtjes së rendit.
Testimi është e vetmja rrugë për të frenuar përhapjen e COVID-19, bashkë me distancimin fixik e social.
#qendronineshtepi duhet të shoqërohet me testimin në shkallë të gjërë, por edhe me pajisjen me mjete mbrojtëse të personelit shendetësor, policisë, ushtrisë dhe personave që veprojnë në territorin e Shkodrës!
