Për shkak të motit të keq, me reshje shiu intensive, ka ndikuar në rritjen e nivelit të lumit të Vjosës. Kryeministri Edi Rama ka reaguar në rrjetet sociale, në lidhje me situatën në terren si pasojë e reshjeve të dendura të shiut. Kreu i qeverisë shprehet se ekipet mjekësore janë në terren për banorët e prekur nga përmbytjet, si pasojë e daljes nga shtrati të lumit Vjosë.
“Ekipet mjekësore janë në gatishmëri, duke garantuar shërbimin mjekësor që i nevojitet banorëve të prekur nga përmbytjet, si pasojë e daljes nga shtrati të Vjosës. Telefononi 127 për çdo urgjencë mjekësore”, shkruan Rama.
Hektarë të tëra toke janë përmbytur nga uji në zonën përreth lumit Vjosë, dhe gjithashtu edhe banesa. Prej orëve të para të ditës ka pasur evakuime të shumta, ndërsa dëme deri tani ka në gjënë e gjallë dhe të mbjella.
Vjosa ka kaluar pikun e saj, por pritet që gjatë orëve të pasdites të ketë një rënie të nivelit dhe përmirësim të situatës. Ministria e Mbrojtjes iu ka bërë apel banorëve që duhet të evakuohen, dhe të mos bëjnë rezistencë.
