Në Vlorë është vënë në pranga Spartak Dyrmishi, 45-vjeç, që kërkohej nga Greqia për përdhunim. Policia e Shtetit ka dhënë informacion për aksionin në Vlorë, për arrestimin e shqiptarit që përdhunoi 34-vjeçaren greke.
“Policia e Shtetit, menjëherë pas shkëmbimit të informacioneve me homologët grekë, për një shtetas shqiptar që kishte përdhunuar një shtetase dhe kishte tentuar të përdhunonte një shtetase tjetër, organizoi strukturat operacionale për të ushtruar kontrolle të imtësishme në territorin ku dyshohej se fshihej 45-vjeçari”.
Në orët e vona të mbrëmjes së djeshme, strukturat operacionale të Drejtorisë Vendore të Policisë Vlorë kanë bërë të mundur kapjen e shtetasit Spartak Dyrmishi, 45 vjeç, banues në Vlorë.
Në orët e para të ditës së sotme, policia shqiptare e ka dorëzuar atë në Pikën e Kalimit Kufitar Kakavijë.
