Kryeministri Rama ka reaguar sërish në rrjetet sociale, pas akuzave që Sali Berisha ka bërë ndaj tij për udhëtimet me charter. Rama thotë se opozita ka si qëllim nxitjen e popullit për konflikt përmes shpifjeve.
“Po ku është hilja thonë se s’ka mundësi?! Ka si s’ka! Hilja është ashiqare fare tek përpjekja non stop për ta helmuar, çoroditur, nxitur për sherr e për konflikt këtë popull me shpifje sa më të përbindshme, nisur nga gjysëm të vërteta që janë edhe gënjeshtrat më të mëdha!
Lëre pastaj kur thonë me charter udhëtojnë vetëm sheikët e diktatorët, ndërkohë që tërë qeveritë e rajonit, se Europës po e po, kanë avionët e tyre përjashto Shqipërinë e Kosovën! Ne s’e blejmë dot, me qera s’e marrim dot, ndaj kemi blerë orë fluturimi me marrëveshje promocionale!
Jemi pyetur shumë herë këto vite për avionin ALBANIA dhe i kemi dhënë informacionet, po tani u bashkuan hakerat iranianë dhe grupi Rubla Çorba, kështu që u ngrit tymi lart se helbete, duhet hedhur sa më shumë blozë, “S’ka asnjë faj Putini, çohu o popull se duhet rrëzuar regjimi!”
I Zot të qash a të qeshësh, vetëm këtu bën vaki të të dyndin me shpifje dhe të të thonë bëj transparencë! Po si bëhet kjo transparenca kur u tregon shifrat dhe bëjnë sikur nuk kuptojnë?! Po kur thonë pse i bën reklamë Shqipërisë? Po kujt t’i bëj, kanaleve, portaleve apo rublave?!”, shkruan Rama.
Po ku është hilja thonë se s’ka mundësi?! Ka si s’ka! Hilja është ashiqare fare tek përpjekja non stop për ta helmuar, çoroditur, nxitur për sherr e për konflikt këtë popull me shpifje sa më të përbindshme, nisur nga gjysëm të vërteta që janë edhe gënjeshtrat më të mëdha!
— Edi Rama (@ediramaal) November 1, 2022
Berisha ka shtuar sulmet ndaj Ramës dhe ka paralajmëruar ngritjen e një komisioni hetimor, pas skandalit për fluturimet e kryeministrit me charter. Berisha kërkoi që të nisë edhe hetimi i Air Albania. Në mbledhjen e grupit parlamentar, Berisha kërkoi dje që Komisioni Hetimor i propozuar nga PD-ja, të përfshijë hetimin e Air Albania, që sipas Berishës është kompani e lidhur ngushtë me kryeministrin Edi Rama. Berisha e mbylli fjalimin duke thënë se pozitive nga e gjithë kjo situatë është që Rama nuk e fajësoi atë për fluturimet.
