Vijës së parë të luftës kundër koronavirusit ka vendosur që t’i bashkohet edhe Fondacioni “Fundjavë Ndryshe”.
Stafi i fondacionit të njohur, me në krye Themeluesin Arbër Hajdari, prej disa ditësh ndodhet në terren, duke trokitur derë më derë për të shpërndarë ndihma tek shqiptarët e vetëizoluar.
Bëhet fjalë për një shpërndarje masive ndihmash, specifikisht, për mbi 8000 familje të izoluara.
Mirëpo përveç produkteve ushqimore bazike, FFN po shpërndan tek nevojtarët edhe produkte farmaceutike, kryesisht dezinfektantë, në mënyrë që ata të mbrohen nga koronavirusi.
Drejtuesi i Fondacionit “Fundjavë Ndryshe”, Arbër Hajdari, së fundmi ka publikuar një video në llogarinë e tij në Facebook, krah së cilës shkruan: “Ne do të vazhdojmë pa ndaluar asnjë ditë, për të trokitur derë më derë, ju lutemi rrini në shtëpi. Zoti ju ruajtë të gjithëve!”
Kujtojmë se… çdo ditë, stafi i FFN përpiqet që përpos ndihmave të shpërndara, edhe të sensibilizojë qytetarët me këshilla mjaft efikase që iu vijnë atyre në ndihmë për të frenuar infektimin me COVID-19.
Në këtë periudhë të pazakontë dhe tepër të vështirë, Fondacioni fillimisht e ka përqendruar aksionin e shpërndarjes së ndihmave tek më të varfrit, jetimët dhe mosha e tretë, për të vijuar më pas tek të gjithë të tjerët që kanë më së shumti nevojë.
“Kjo është një luftë që do ta fitojmë të gjithë bashkë”, është shprehur më herët Arbër Hajdari, i cili në reagimet e tij publike nuk nguron që herë pas here të falenderojë përzemërsisht bamirësit për solidaritetin e shprehur.
“BAMIRËSIA NUK TË VARFËRON!”
