“Fundjavë Ndryshe” iu është gjendur pranë shqiptarëve në këto ditë izolimi që për hir të së vërtetës ngjasojnë me një periudhë lufte.
Koronavirusi prej javësh tashmë ka “trokitur” edhe në ‘derën’ e vendit tonë, duke i gjetur veçanërisht njerëzit në nevojë, të “çarmatosur” dhe në mëshirë të fatit.
Ata janë detyruar që të mbajnë mbi supe edhe peshën e panikut, që pashmangshmërisht është shkaktuar nga COVID-19.
Por, siç e lexuat edhe në fillim të këtij shkrimi, ata nuk janë vetëm!
Në mënyrë të vazhdueshme “Fundjavë Ndryshe” është gjendur pranë tyre me ndihma ushqimore dhe suport moral.
https://www.instagram.com/p/B-UTcbjDCQ3/
Që prej shpërthimit të koronavirusit, Fondacioni i njohur ka nisur përgatitjen e 8000 pakove ushqimore dhe deri më tani është raportuar se janë shpërndarë 7000 prej tyre.
Ndërkohë ndihma dhe solidariteti do të vazhdojë… nuk ndalet me kaq!
Drejtuesi i Fondacionit “Fundjavë Ndryshe” Arbër Hajdari, ishte i ftuar së fundmi në emisionin “Real Story” në “News 24”, prej ku dha lajmin e mirë se përpos 8000 pakove, po përgatiten edhe 8000 pako të tjera ushqimore që do të shpërndahen tek njerëzit që kanë më së shumti nevojë.
“Që në ditët e para kemi mobilizuar stafin, kemi trajnuar stafin. Janë pajisur me mjetet mbrojtëse si maska, doreza, në mënyrë që ata të jenë sa më të sigurt gjatë shpërndarjes së ndihmave në terren.
Kemi marrë masa një javë para se pandemia të shpërthente në Shqipëri. Është nisur paketimi i 8 mijë pakove ushqimore që në javën e parë, ndërkohë deri më tani kemi shpërndarë 7 mijë prej tyre.
Po përgatisim edhe 8000 pako të tjera ushqimore. Kemi pasur një bashkëpunim me Qendrën Kombëtare të Emergjencës dhe jemi koordinuar në mënyrë që të shmangnim mbivendosjen e ndihmave. Në disa raste kemi pasur nevojë edhe për ndërhyrjen e ushtrisë”, tha Hajdari.
I pyetur nga gazetari Sokol Balla, se si paraqitet situata në terren, Themeluesi i “Fundjavë Ndryshe” u përgjigj:
“Situata në terren është e vështirë për shkak se tashmë është zgjeruar rrethi.
Sot kemi edhe shumë familje të tjera që kanë nevojë për ndihmë, si për shembull moshat e treta dhe për shkak se janë të izoluar është shtuar rrezja e ndihmës dhe kërkesa është shumë herë më e madhe. Situata në terren është e vështirë pasi ka njerëz që duan të ushqehen, por ka edhe njerëz që janë në panik.
Unë dua t’u bëj thirrje që të rrinë të qetë, duhet të bëjmë durim. Ka një grup shumë të madh njerëzish që janë duke punuar në terren për të mbërritur në çdo familje.
Vështirësia më e madhe me të cilën po ndeshemi është kërkesa e lartë për ndihmë”.
Gjithashtu Arbër Hajdari falenderoi përzemërsisht të gjithë vullnetarët e “FFN”, të cilët prej javësh nuk janë me familjet e tyre, por në terren duke shpërndarë ndihma.
