Shqipëria humbi gjyqin ndaj Becchettit, Meta: SPAK të nisë hetimet

Presidenti i Republikës, Ilir Meta ka reaguar në lidhje humbjen e gjyqit të Shqipërisë me biznesmenin italian, Francesco Becchetti.

Meta shprehet se e ka paralajmëruar shumë herë qeverinë që të heqë dorë nga arroganca dhe të tërheq të gjitha vendimet për të ‘bllokuar’ investitorët e huaj në vend.

Sipas Kreut të Shtetit, Prokuroria e Posaçme Antikorrupsion (SPAK) duhet që të nisë hetimet penale kundër kryeministrit Edi Rama për dëmin që i ka shkaktuar shtetit.

Postimi i Metës në rrjetin social, Facebook

E kam paralajmëruar prej kohësh Qeverinë ende në detyrë të heqë dorë nga arroganca dhe të tërhiqet nga çdo vendim abuziv e jashtë procedurave ligjore ndaj investitorëve të huaj në vendin tonë. Vetëm për tekat dhe kapriçot personale të Kryeministrit, i cili e urren edhe lirinë e medias, tashmë Shqipëria është e detyruar të paguajë 110 milion euro.Skandali merr përmasa më të mëdha, për shkak se Avokatura e Shtetit e ka gënjyer Presidentin e Republikës duke pretenduar se nuk e ka humbur gjyqin me kompaninë në fjalë, madje duke fshehur informacion.

Në këto kushte, i bëj thirrje Prokurorisë së Posaçme Antikorrupsion (SPAK), të nisë urgjentisht hetimet penale për këtë dëm të madh ekonomik të shkaktuar shtetit dhe që do paguhet fatkeqësisht me paratë e të gjithë taksapaguesve shqiptarë. Është koha, që Drejtësia të vendosë para përgjegjësisë ligjore, të gjithë shkaktarët e këtij dëmi ekonomik, edhe për të parandaluar në të ardhmen dëme më të mëdha për Buxhetin e Shtetit dhe taksapaguesit shqiptarë, për shkak të shpërdorimit të detyrës dhe abuzimit me pushtetin të zyrtarëve të lartë.