Në rrjet u bë virale letra ku Ardi Veliu i kërkon dorëheqjen Ramës nga posti i drejtorit të Përgjithshëm të Policisë së Shtetit. Ardi Veliu kishte ‘masakruar’ gjuhën shqipe. Letra e dorëheqjes është e mbushur plot me gabime drejtëshkrimore. Nuk dihet nëse ato janë gabime shpejtësie apo neglizhencë për mos korrektim.
Por është për të ardhur keq që akti i largimit të njërit prej drejtuesve më të kontestuar dhe akuzuar të policisë, ka pafund gabime drejtëshkrimore.
Ish-zyrtari i policisë Dritan Zagani, nga studio e emisionit “Breaking” në “Top News” tha se me atë shkresë Veliu “ka degjeneruar institucionin e policisë”.
Sipas Zaganit, Veliu është shkarkuar dhe jo dorëhequr. “Vetëm po të shohësh me vemendje letrën, kuptohet se është shkruar në çast. Ndërsa kishte dhjetëra gabime ortografike. Ai ishte Drejtor i Përgjithshëm i Policisë. Atë letër e ka shkruar Fuga, ‘shkruaje këtu hajvan’, i kanë thënë. Mungon vula, stema e Republikës së Shqipërisë. Na ka degjeneruar komplet fjalën dhe rolin e policit. As sekretari i tij nuk e ka bërë këtë”, tha Zagani.
Ai shtoi më tej se Veliu ishte vegël e Fatmir Xhafajt, ndërsa doli hapur në shërbim të vëllait të tij. Zagani shprehu qëndrimin e tij ku tha se Ardi Veliu nuk ka qenë polic, dhe as nuk do të jetë, duke e konsideruar si një shërbëtor të politikës.
“Nuk ka qenë polic dhe as nuk do jetë. Ka qenë sherbëtor i politikës, ushtar i bindur. Kemi patur zyrat përballë në Vlorë. Në këto 4 vjet, demonstroi se nuk u bë polic, por ushtar i politikës. Ishte vegël e ministrit Xhafaj, mbrojti të pambrojtshmen. U pozicionua keq që në fillim. Doli në shërbim të vëllait të ministrit Xhafaj, dihej se do shkonte atje se ishte vendimi në Itali, por nuk la gur pa lëvizur”, tha Zagani.
