Vihen në pranga dy të rinj për shpërndarjen e lëndëve narkotike. Specialistët e Seksionit për Hetimin e Narkotikëve në bashkëpunim me Forcën e Posaçme “Shqiponjat”, mësohet se kanë arrestuar në flagrancë dy shtetas, R. D. 29-vjeç dhe R. M, 30-vjeç, ndërkohë që janë sekuestruar disa doza me lëndë narkotike kokainë, peshore elektronike dhe aparatet celularë me të cilët dy të prangosurit komunikonin për shpërndarjen.
29-vjeçari u arrestua gjatë momentit të shpërndarjes, ndërkohë që pas kontrollit fizik dhe kontrollit të ushtruar në banesën e këtij shtetasi, u gjetën dhe u sekuestruan në cilësinë e provës materiale një sasi dozash me lëndë narkotike kokainë, 2 aparate celular, dhe 87 qese farmaceutike që përdoreshin për paketimin e lëndës narkotike.
Ndërsa 30-vjeçarit R. M., pasi gjatë kontrollit në mjetin me të cilin ai qarkullonte dhe në banesën e tij, iu gjet dhe iu sekuestrua një sasi lëndë narkotike kokainë dhe një peshore elektronike, që përdorej për peshimin dhe ndarjen e lëndës narkotike në doza.
Dy të rinjtë do të jenë nën hetim për veprën penale “Prodhimi dhe shitja e narkotikëve”, ndërkohë që policia ka bërë të ditur se po ndjek më vëmendje këtë treg në Tiranë, për të evidentuar dhe prangosur shpërndarësit dhe pronarët e drogërave që shiten në kryeqytet.
