Ashtu siç ishte paralajmëruar opozita zhvilloi sot protestën “më të madhe, të parë ndonjëherë”. Të paktën kështu u cilësua më parë prej demokratëve. Deri në orën 11, kur pritej të fillonte protesta, gjithçka ishte e qetë në bulevardin para Kryeministrisë. Ku më shumë se qytetarët ishin forcat e policisë të rreshtuar dhe mediat që bëheshin gati.
Por, me ardhjen e krerëve partiakë, të shumtë ishin edhe protestuesit të cilët rrethuan Bashën, teksa mbajti fjalimin, duke akuzuar qeverinë Rama për lidhjen me drogën.
Më pas, të revoltuar dhe me liderët e opozitës në krye, protestuesit marshuan drejt sheshit “Nënë Tereza”. Por, më parë u siguruan të hidhnin tymuese, shishe, gurë e sende të tjera drejt kordonit të policisë. Gjithçka u mbulua nga tymi rozë.
Në një reagim për Tirana Today, ish-ministri i Drejtësisë, Ylli Manjani shprehet se edhe pse është shpejt për ta vlerësuar, numri i protestuesve është i kënaqshëm.
“Për mua numri i protestuesve sot i plotësoi pritshmëritë. Se çfarë ka thënë z.Xhafaj dhe xhafallarët në këtë vend i keni parë. Nëse nuk duan ta kuptojnë, le të rrinë në vend. Por, do zhduken një ditë. Vetëm ditën kur të mos jenë aty, ta mendojnë mirë.”
Ndërsa më pas t’u zhvendosur drejt Ministrisë së Brendshme, ku protestuesit u përplasën me Forcat e Ndërhyrjes së Shpejtë.
Konfrontimi fizik përfundoi deri në plagosjen e gazetarit Bledi Kasmi. A i provokoi ai policët apo u godit teksa po raportonte? Por, kjo është një tjetër çështje.
Një tjetër figurë përfaqësuese e protestës së sotme ishte edhe këngëtari Stresi, i cili u sigurua të ‘ngrinte’ në këmbë ata protestues më gjaknxehtë dhe të çanin kordonin e policisë.
Por, menjëherë në këtë moment vjen kreu i Partisë Demokratike dhe i tërheq protestuesit.
Me zemërimin të cilin ua preu në mes, ata largohen duke lënë pas rrëmujën e një proteste të zakonshme.
Nuk ishte një protestë e vogël, apo pa rrëmujë, por ishte larg të qenurit një revoltë popullore dhe aq më tepër një paralajmërim që Xhafaj apo Rama të ndjehen të “kërcënuar” e të lënë pushtetin.
“Nuk ka shanse të rrëzohet Rama, ne shpresojmë që të rrëzohet, por kjo gjë nuk ndodh dot. Ne duam që të jetë një qeveri demokratike, nuk ka rëndësi në është Basha apo jo. Nuk bëhet lufta për Bashën, absolutisht që jo.”-shpehen qytetarë për Tirana Today.
U premtua një protestë, fundi i të cilës nuk dihej. Më pas policia tha se do opozita kishte leje për vetëm 4 orë, por e gjitha zgjati shumë më pak.
Është kjo një strategji e Bashës apo një paaftësi për të krijuar një tubim i cili do të bëjë ndryshimin për t’i bërë “gjyqin publik” ecurisë së kësaj qeverie?
Por, para se të ndodhë ky ndryshim, kreu i demokratëve duhet të bëjë një revolucion në mënyrën si i realizon këto protesta. Pasi, qytetarët duan diçka tjetër. TIRANA TODAY
