Ministria e Shëndetësisë bën me dije se një tjetër person ka ndërruar jetë si pasojë e koronavirusit në Shqipëri.
Bëhet fjalë për një 85-vjeçare e cila vuante nga sëmundje të tjera bashkëshoqëruese. Sipas MSH, e moshuara vuante nga insuficiencë kardiake kronike, fibrillacion atrial dhe hipertension.
Kështu shkon në 34 numri i personave që kanë humbur jetën nga koronavirusi në vend.
Njoftimi i plotë:
Ndërron jetë në spitalin infektiv 85-vjeçarja me COVID19, kishte sëmundje bashkëshoqëruese
Mbrëmjen e sotme ka ndërruar jetë në spitalin Infektiv një paciente 85-vjeçare nga Tirana, e konfirmuar me COVID-19. E moshuara e cila vuante nga insuficiencë kardiake kronike, fibrillacion atrial dhe hipertension, referuar shërbimit infektiv, ndërroi jetë si pasojë e dekompensimit progresiv kardiak dhe pulmonar fatal nga COVID19.
85-vjeçarja me inicialet H.K, nuk arriti dot të mbijetonte, pavarësisht mjekimit intensiv dhe përpjekjeve të stafit mjekësor.
85-vjeçarja është viktima e 34 e COVID-19 në Shqipëri.
Ministria e Shëndetësisë i shpreh ngushëllimet familjes së të ndjerës dhe apelon edhe një herë qytetarët të respektojnë rregullat e distancimit social, të shmangin grumbullimet dhe të ruajnë higjienën vetjake, për të mbrojtur veten dhe të tjerët.
