Aleanca për Mbrojtjen e Teatrit ka njoftuar se kur dhe ku do të mbahet protesta e radhës, lidhur me çështjen e shembjes së godinës së Teatrit Kombëtar.
Pas përfundimit të protestës së sotme, aktivistët vendosën që protesta e radhës të zhvillohet nesër para SPAK.
Regjisori Robert Budina u shpreh se aktivistët do të jenë të pranishëm në orën 11:00 para këtij institucioni, për të nxitur hetimet rreth shembjes së teatrit, por dhe padive që janë bërë.
“Nesër në 11:00 para SPAK për të nxitur hetimet. Do të mbledhim firma qytet më qytet për ndërtimin e teatrit të ri”, tha ai.
Protesta e sotme filloi në orën 17:30 dhe zgjati rreth 2 orë. Ndryshe nga protestat e tjera, kjo e sotmja nuk u shoqërua nga asnjë incident.