Sali Berisha nuk do të jetë më pjesë e grupit parlamentar të PD. Kryedemokrati Lulzim Basha përjashtoi nga partia themeluesin e saj. Pas vendimit të kryetarit të PD, ka ardhur një reagim nga Ambasada Amerikane në Tiranë.
Ambasada e SHBA ka përgëzuar për vendimin kryedemokratin Basha, ndërsa thekson se PD ka kurajon të shkëputet nga e kaluara, për të ndërtuar të ardhmen. Ndër të tjera, SHBA shpreh mbështetjen ndaj Bashës, për të forcuar marrëdhëniet mes palëve.
“Vendimi i vështirë i shpallur dje nga Kryetari Lulzim Basha meriton respekt. Ky vendim demonstron se, ashtu siç ndodhi 30 vjet më parë dhe në momente të tjera kritike në historinë e Shqipërisë, Partia Demokratike ka kurajon për t’u ndarë nga e shkuara me qëllim që të ndërtojë të ardhmen, për të ndihmuar që ta udhëheqë Shqipërinë përpara. Shtetet e Bashkuara kanë pasur një marrëdhënie të veçantë me Partinë Demokratike që nga themelimi i saj dhe presim me kënaqësi të punojmë më ngushtë se kurrë me Kryetarin Basha dhe Partinë Demokratike për të forcuar marrëdhëniet SHBA-Shqipëri”.
