Një ngjarje e rëndë është shënuar ditën e sotme në New Jersey, në SHBA, teksa policia ka gjetur 17 trupa të pajetë brenda një azili.
Sipas mediave amerikane, dyshohet se 17 të moshuarit të kenë humbur jetën për shkak të koronavirusit. Një person anonim ka lajmëruar policinë, e cila më pas është shfaqur në vendin e ngjarjes, ku është ballafaquar me skenën e rëndë.
Trupat e pajetë ishin futur në një hapësirë që shërbente si morg, por që nuk kishte kapacitet për të mbajtur 17 viktima.
New Jersey është vendi i dytë më i prekur nga COVID-19 në SHBA, pas New York-ut. Ai regjistron mbi 71 mijë raste infektimi dhe 3,156 viktima. Ndërsa New York regjistron mbi 214 mijë persona të infektuar dhe 11,856 njerëz të vdekur.
SHBA është vendi më i prekur nga koronavirusi në botë, duke regjistruar 646,305 raste infektimi dhe 28,640 viktima.
Më shumë se 2,1 milionë njerëz nga e gjithë bota janë prekur nga COVID-19, ndërsa mbi 137 mijë persona kanë humbur jetën.
